صحافیوں میں عاجز، ریاض عاجز کا چاردہائیوں کا صحافتی سفر۔۔۔

تحریر: شاہد غزالی
صحافت میں اگر شرافت ایمانداری اور جرات کے ساتھ ذمہ دارانہ صحافت کی بات ہوگی تو چند ہی دلیر صحافی کے نام لیے جائیں گے ان میں ایک نام ریاض عاجز ہے ۔ ریاض عاجز کے دوست تو لاتعداد ہوں گے لیکن میں سمجھتا ہوں کہ ریاض عاجز کے ساتھ صحافت میں جتنا وقت میں نے گزارا ہے شاید ہی کسی اور نے گزارہ ہو کیونکہ ان کے ساتھ رپورٹنگ اورلاتعداد انٹرویو کیے ایک ساتھ کیے ۔پی ٹی وی سمیت متعدد اخبارات میں ایک ساتھ کام کیا ۔ریاض عاجز نے کبھی اصولوں پر اور غلط بات پر سمجھوتہ نہیں کیا۔ لگی لپٹی رکھی نہیں منہ پر ہی جواب دے دیا۔ اس کی وجہ سے کئی بار ان پر میڈیا کے دروازے بھی بند کرنے کی کوشش کی گئی۔ ازمائش اور مشکلات میں بھی حق اور سچ کا ساتھ نا چھوڑا ، نا کسی کے سامنے سر جھکایا نا کسی کے سامنے دست پھیلایا اور اپنی مدد آپ کے تحت اللہ توکل پر آگے بڑھتے گئے اور کامیاب رہے ۔
پاکستان کی صحافت کی تاریخ ایسے ناموں سے بھری پڑی ہے جنہوں نے اپنے قلم، آواز، مشاہدے اور پیشہ ورانہ صلاحیتوں کے ذریعے صحافت کے مختلف ادوار میں اپنی شناخت قائم کی۔ ان ہی صحافتی شخصیات میں معروف صحافی ریاض عاجز کا نام بھی شامل ہے، جنہوں نے پرنٹ میڈیا سے اپنے سفر کا آغاز کیا اور بعد ازاں ریڈیو، ٹیلی وژن، رپورٹنگ، اینکرنگ اور دستاویزی فلم سازی کے میدان میں اپنی صلاحیتوں کا اظہار کیا۔
ریاض عاجز کا صحافتی سفر کئی دہائیوں پر محیط ہے۔ اس دوران انہوں نے صحافت کے بدلتے ہوئے تقاضوں، ذرائع ابلاغ کی ترقی اور ابلاغ کے نئے انداز کے ساتھ خود کو ہم آہنگ رکھا۔ ان کی پیشہ ورانہ زندگی اس بات کی عکاسی کرتی ہے کہ ایک صحافی کے لیے صرف خبر دینا ہی کافی نہیں بلکہ حالات و واقعات کو سمجھنا، ان کا پس منظر بیان کرنا اور عوام تک درست معلومات پہنچانا بھی بنیادی ذمہ داری ہے۔
ریاض عاجز نے اپنے صحافتی کیریئر میں روزنامہ حریت اور روزنامہ ایکسپریس، خبریں ، امت، دی سن (انگلش) جیسے اخبارات میں بطور رپورٹر خدمات انجام دیں۔ پرنٹ میڈیا میں کام کرتے ہوئے انہیں مختلف سماجی، سیاسی اور عوامی مسائل کو قریب سے دیکھنے اور رپورٹ کرنے کا موقع ملا۔ اخباری صحافت نے ان کے مشاہدے، تحریر اور خبر کے انتخاب کی صلاحیتوں کو نکھارنے میں اہم کردار ادا کیا۔
پرنٹ میڈیا کے بعد انہوں نے الیکٹرانک میڈیا کا رخ کیا اور پاکستان ٹیلی وژن سے وابستگی اختیار کی۔ پی ٹی وی جیسے قومی نشریاتی ادارے میں کام کرنا کسی بھی صحافی کے لیے ایک اہم پیشہ ورانہ تجربہ ہوتا ہے۔ اس کے علاوہ ریڈیو تہران سے وابستگی نے انہیں ریڈیو صحافت اور بین الاقوامی نشریاتی ماحول سے روشناس ہونے کا موقع فراہم کیا۔ ریڈیو کی صحافت میں الفاظ، آواز اور معلومات کی درست ترسیل بنیادی اہمیت رکھتی ہے، جبکہ ٹیلی وژن میں تصویر، آواز اور براہِ راست گفتگو کے ذریعے ناظرین تک خبر پہنچائی جاتی ہے۔ ریاض عاجز نے ان دونوں ذرائع ابلاغ میں کام کرکے اپنے تجربات کو وسعت دی۔
میٹرو ون ٹی وی چینل پر انہوں نے بطور کنٹرولر نیوز اور اینکر اپنی خدمات انجام دیں۔ ٹیلی وژن پر اینکرنگ محض سوالات کرنے یا گفتگو آگے بڑھانے کا نام نہیں بلکہ موضوع کی سمجھ، حالات پر گرفت، مہمانوں سے متعلق معلومات اور غیر جانب دارانہ انداز میں مکالمے کو آگے بڑھانا بھی اس کا حصہ ہے۔ ریاض عاجز نے اس شعبے میں کام کرتے ہوئے رپورٹنگ کے ساتھ ساتھ تجزیاتی اور مکالماتی صحافت میں بھی اپنی دلچسپی کا اظہار کیا۔ میٹروون نیوز کے علاوہ ریاض عاجز نے نیوز ون، بزنس پلس، سچ نیوز سمیت دیگر چینلوں میں کام کیا اور اپنی صلاحیتوں کو منوایا۔
ریاض عاجز کی صحافتی زندگی کا ایک قابلِ ذکر پہلو دستاویزی فلم سازی بھی ہے۔ معروف صحافی منہاج برنا کی زندگی، جدوجہد اور آزادیٔ صحافت کے لیے ان کی خدمات کو اجاگر کرنے کے لیے ریاض عاجز نے ایک دستاویزی فلم تیار کی۔ اسی طرح انسانی حقوق کی ممتاز رہنما عاصمہ جہانگیر کی زندگی اور جدوجہد پر بھی دستاویزی فلم بنانے کا کام کیا۔ انقلابی شاعر حبیب جالب، جون ایلیا کی زندگی پر بھی ان کی توجہ رہی۔ اس کے علاوہ فاطمہ جناح اور اخبارات کے ایجنٹوں کے ملک گیر رہمنا ٹکا خان، معروف صحافی ادریس بختیار، نادر شاہ عادل، سی آر شمسی، حامد میر کی زندگیوں پر بھی انھوں دستاویزی فلمیں بنا کر تاریخ رقم کی ہے۔ علاوہ ازیں جن اہم موضوعات پر انھوں نے دستاویزی فلمیں بنائیں ان میں " پاکستان میں صحافیوں کا اعواء، تشدد اور قتل"، "پاکستان میں ٹریڈ یونین کا عروج و زوال"، " سندھ میں کوٹہ سسٹم"، " پاکستان میں دم توڑتا پرنٹ میڈیا" جیسے دلچسپ اور اہم مضوعات شامل ہیں۔ ریاض عاجز کی یہ کاوشیں اس اعتبار سے اہم ہیں کہ صحافت کا ایک بنیادی فریضہ صرف موجودہ واقعات کی رپورٹنگ نہیں بلکہ ان شخصیات اور تاریخی جدوجہد کو محفوظ کرنا بھی ہے جنہوں نے معاشرے پر اپنے اثرات مرتب کیے۔
ریاض عاجز کاآزادیٔ صحافت، انسانی حقوق اور سماجی شعور سے وابستہ شخصیات پر دستاویزی کام دراصل آنے والی نسلوں کے لیے ایک تاریخی ریکارڈ کی حیثیت رکھتا ہے۔ منہاج برنا اور عاصمہ جہانگیر، احفاظ الرحمان ، نادر شاہ عادل ،حامد میر، ادریس بختیار، سی آر شمسی جیسی شخصیات کی زندگی کے مختلف پہلوؤں کو فلمی دستاویز کی صورت میں محفوظ کرنا صحافتی تاریخ کے ساتھ ایک اہم تعلق کی نشاندہی کرتا ہے۔
ریاض عاجز نے اپنے طویل صحافتی تجربے کو محدود نہیں رکھا بلکہ مختلف ٹی وی پلیٹ فارمز پر بھی اپنی سرگرمیاں جاری رکھیں۔ وہ اس وقت فائن ٹی وی اور دیگر ٹی وی چینلز کے ساتھ وابستہ ہوکر صحافتی و نشریاتی میدان میں کام کر رہے ہیں۔ حالاتِ حاضرہ، سماجی مسائل، سیاسی معاملات اور عوامی موضوعات پر گفتگو اور تجزیاتی پروگراموں میں ان کی دلچسپی ان کے پیشہ ورانہ سفر کا حصہ ہے۔
صحافت ایک ایسا شعبہ ہے جس میں وقت کے ساتھ مسلسل سیکھنے، نئے ذرائع ابلاغ کو سمجھنے اور اپنی صلاحیتوں کو بہتر بنانے کی ضرورت رہتی ہے۔ اخبارات سے ریڈیو، ریڈیو سے ٹیلی وژن اور پھر ڈیجیٹل میڈیا تک کا سفر صحافی کے لیے نئے تجربات اور چیلنجز لے کر آتا ہے۔ ریاض عاجز نے اپنے طویل کیریئر میں صحافت کے مختلف شعبوں سے وابستگی برقرار رکھ کر اس پیشے کے ساتھ اپنی دلچسپی اور وابستگی کا اظہار کیا ہے۔
بلاشبہ، صحافی کی اصل پہچان اس کی پیشہ ورانہ دیانت، مشاہدے، تحقیق، عوامی مسائل سے وابستگی اور تاریخ کے لیے چھوڑے گئے کام سے ہوتی ہے۔ ریاض عاجز کا صحافتی سفر ان مختلف جہتوں کا مجموعہ ہے، جس میں اخباری رپورٹنگ، ریڈیو نشریات، ٹیلی وژن اینکرنگ اور دستاویزی فلم سازی شامل ہیں۔
ان کی صحافتی خدمات کا جائزہ لیتے ہوئے یہ کہنا بجا ہوگا کہ انہوں نے ذرائع ابلاغ کے مختلف پلیٹ فارمز پر کام کرکے اپنے تجربات کو وسعت دی اور صحافت کے بدلتے ہوئے منظرنامے کے ساتھ اپنا تعلق برقرار رکھا۔ ایسے تجربہ کار صحافیوں کا علمی و پیشہ ورانہ سرمایہ نئی نسل کے صحافیوں کے لیے رہنمائی کا ذریعہ بن سکتا ہے۔
ریاض عاجز کا سفر جو اب بھی جاری و ساری ہے، اس حقیقت کی یاد دہانی ہے کہ صحافت صرف ایک پیشہ نہیں بلکہ معاشرے، تاریخ اور عوامی شعور سے جڑی ہوئی ایک مسلسل ذمہ داری ہے جسے احسن طریقے سے نبھانا ہی ایک صحافی کی اصل پہچان ہے۔(شاہد غزالی)۔۔۔