جنت مرزا کے ساتھ فلم کرنا تباہی تھا،سید نور۔۔

فلم ڈائریکٹر و پروڈیوسر سید نور نے ٹک ٹاکر جنت مرزا کو اپنی فلم میں لینا تباہی قرار دے دیا۔حال ہی میں سید نور کے ایک انٹرویو کا کلپ سوشل میڈیا کی زینت بنا ہوا ہے جس میں ان سے سوال کیا گیا کہ ‘بہت سے افراد انسٹاگرام کے ذریعے مشہور ہوتے ہیں اور انہیں ان کے فالوورز دیکھ کر کاسٹ کیا جاتا ہے، وہ اسٹار بن جاتے ہیں، آپ نے بھی ایک تجربہ ایسا کیا تھا لیکن وہ کامیاب نہیں ہوسکا’۔جواب میں سید نور نے کہا ‘جنت مرزا کو اپنی فلم میں لینا تباہی کے سوا کچھ نہیں تھا، وہ فلم اتنی محنت سے بنائی گئی تھی لیکن لوگ اسے دیکھنے سنیما گھروں میں آئے ہی نہیں ‘۔ہدایتکار نے کہا ‘لوگوں کا یہ نظریہ ہوگا کہ یہ (جنت مرزا) ہمیں ٹک ٹاک پر دیکھنے کو مل جاتی ہے تو جاکر کیا کریں گے‘۔سید نور کا کہنا تھا کہ ‘پہلے جو فلمیں ہوتی تھیں ان کی اپنی آڈئینس ہوتی تھیں، لوگ انتظار کرتے تھے کہ فلاں کی فلم آئے گی تو جاکر دیکھیں گے لیکن اب وہ بات نہیں ہے کہ لوگ انتظار کریں کہ کسی اداکار کی فلم آئے تو جاکر دیکھیں’۔سید نور نے مزید کہا کہ ماضی میں فلمی ستاروں کی اپنی ایک مخصوص آڈینس ہوا کرتی تھی، لوگ پسندیدہ اداکاروں کی نئی فلموں کا بے چینی سے انتظار کرتے تھے، مگر اب حالات بدل چکے ہیں۔ ان کے بقول موجودہ دور میں صرف شہرت یا سوشل میڈیا فالوونگ کسی فلم کی کامیابی کی ضمانت نہیں رہی۔انہوں نے اس بات پر زور دیا کہ فلمی دنیا میں کامیابی کے لیے محض آن لائن مقبولیت کافی نہیں بلکہ مضبوط کہانی، مؤثر اداکاری اور سینما کی کشش بنیادی اہمیت رکھتی ہے۔