سینئر صحافی شاہین صہبائی کے دماغ  کا کامیاب آپریشن۔۔

سینئر صحافی شاہین صہبائی نے کہا ہے کہ وہ  امریکا میں دماغ کے ٹیومر کے کامیاب آپریشن کے بعد صحت یاب ہو رہے ہیں۔ انہوں نے بتایا کہ چار گھنٹے طویل سرجری کے ذریعے ٹیومر نکال دیا گیا، جس کے باعث انہیں بولنے میں دشواری، سانس کے مسائل اور دیگر طبی پیچیدگیوں کا سامنا تھا۔شاہین صہبائی نے جمعرات کو سوشل میڈیا پلیٹ فارم ایکس پر جاری بیان میں کہا کہ وہ گزشتہ کئی ہفتوں سے منظرِ عام سے غائب تھے کیونکہ ڈاکٹروں نے فوری سرجری کا مشورہ دیا تھا۔ ان کے مطابق ادویات علامات پر قابو پانے میں ناکام ہو چکی تھیں۔انہوں نے بتایا کہ ٹیومر کے باعث ان کی گفتگو غیر واضح ہو گئی تھی، وزن تیزی سے بڑھ رہا تھا، نیند کے مسائل، ہارمونز کی خرابیاں اور سانس لینے میں دشواری بھی پیدا ہو گئی تھی۔اپنے بیان میں شاہین صہبائی نے کہا،میں اب تقریباً معمول کی حالت میں ہوں، روزانہ 14 گھنٹے بیدار اور متحرک رہتا ہوں، اور جلد اپنی سرگرمیاں دوبارہ شروع کروں گا۔انہوں نے ناقدین کو بھی جواب دیتے ہوئے کہا کہ بعض لوگ سمجھ رہے تھے کہ وہ غیر فعال یا سیاسی طور پر تنہا ہو چکے ہیں، تاہم وہ “صاف، تازہ اور متحرک دماغ کے ساتھ واپس آ رہے ہیں۔تاحال ان کی صحت سے متعلق مزید تفصیلات جاری نہیں کی گئیں، جبکہ اہلِ خانہ یا نمائندوں کی جانب سے بھی میڈیا پر واپسی کے وقت کے بارے میں کوئی باضابطہ بیان سامنے نہیں آیا۔