بھارتی ہائی کمشنرکے اعزاز میں  خاتون اینکر کا کھانا

انڈین ہائی کمشنر نے اہلیہ سمیت ہڑپہ جاتے ہوئے رینالہ خورد میں قیام کیا جہاں خاتون اینکر اور رکن پنجاب اسمبلی جگنو محسن کی طرف سے ان کے اعزاز میں کھانے کا اہتمام کیا گیا۔ پاکستان میں انڈین ہائی کمشنر اجے بساریا گزشتہ روز اپنی اہلیہ بھارتی چتر ویدھی کے ہمراہ ہڑپہ میں آثار قدیمہ دیکھنے جا رہے تھے ،وہ راستے میں رینالہ خورد (اوکاڑہ) رکے ،یہاں پر مچلز فروٹ فارم میں حلقہ پی پی184سے آزاد رکن پنجاب اسمبلی جگنو محسن نے ان کے اعزاز میں ضیافت کا اہتمام کیا جس میں سابق نگران وزیر اعلیٰ و سابق چیئرمین پی سی بی نجم سیٹھی نے بھی شرکت کی۔جگنو محسن نے بتایا کہ انڈین ہائی کمشنر کی اہلیہ ’’سموگ‘‘ پر بڑا کام کر رہی ہیں ،جگنو محسن کے بقول انڈین ہائی کمشنر اجے بساریا نے بات چیت کے دوران کہا کہ دونوں ممالک کے عوام کو ایک دوسرے کے قریب لانے کے لئے ویزا کے معاملات کو آسان بنانا ہو گا۔