چینل مالک کے ناقابل ضمانت وارنٹ گرفتاری جاری۔۔۔

لاہور کی سیشن عدالت نے بسم اللہ ڈویلپرز اور 89 نیوز کے مالک کے ناقابلِ ضمانت وارنٹ گرفتاری جاری کرتے ہوئے انہیں آئندہ سماعت پر عدالت میں پیش کرنے کا حکم دے دیا۔عدالتی ریکارڈ کے مطابق حاجی اخلاق احمد کے خلاف ایک شہری کی جانب سے ہتکِ عزت کے قانون کے تحت مقدمہ دائر کیا گیا ہے، جس کی سماعت لاہور کی عدالت میں جاری ہے۔مقدمے کی گزشتہ کارروائی کے دوران عدالت کی جانب سے جاری کردہ سمن/عدالتی عمل درآمد کی رپورٹ واپس موصول ہوئی، تاہم جواب دہندہ عدالت میں پیش نہ ہوا۔ 6 اکتوبر 2026 کو کیس کی سماعت کے موقع پر ایڈیشنل سیشن جج لاہور عبدالغفار نے حکم جاری کرتے ہوئے کہا کہ جواب دہندہ کی عدم حاضری کے باعث اسے ناقابلِ ضمانت وارنٹ گرفتاری کے ذریعے 22 اکتوبر 2026 کو عدالت میں طلب کیا جائے۔
عدالتی حکم نامے میں درج ہے کہ "Process received back but respondent did not appear"، جس کے بعد عدالت نے ناقابلِ ضمانت وارنٹ گرفتاری جاری کرنے کا حکم دیا۔
عدالت میں مدعی کی جانب سے ایڈووکیٹ ندیم سرور پیش ہوئے۔ عدالتی ریکارڈ کے مطابق اس سے قبل کیس کی کارروائی 6 اکتوبر 2026 کے لیے مقرر کی گئی تھی، تاہم متعلقہ کارروائی کے بعد عدالت نے جواب دہندہ کی حاضری یقینی بنانے کے لیے سخت قانونی قدم اٹھایا۔عدالت نے حکم دیا ہے کہ حاجی اخلاق احمد کو ناقابلِ ضمانت وارنٹ گرفتاری کے ذریعے 22 اکتوبر 2026 کو عدالت کے روبرو پیش کیا جائے۔واضح رہے کہ ناقابلِ ضمانت وارنٹ گرفتاری کا اجرا مقدمے میں جرم ثابت ہونے کے مترادف نہیں بلکہ عدالت میں حاضری یقینی بنانے کے لیے جاری کیا جانے والا قانونی حکم ہے۔ ہتکِ عزت سے متعلق اصل مقدمے کا فیصلہ شواہد اور فریقین کے مؤقف سننے کے بعد عدالت کرے گی۔