اسلام کی خاطر شوبز انڈسٹری سے کنارہ کشی اختیار کرنے والی سابقہ اداکارہ و ماڈل زینب جمیل پر لاہور کے علاقے ڈیفنس میں اُن کے سیلون کے باہر قاتلانہ حملہ ہوا ہے ،واضح رہے کہ زینب جمیل نے سال 2020 میں اسلام کی خاطر شوبز چھوڑنے کا اعلان کیا تھا، اُنہوں نے کہا تھا کہ مجھے فخر ہے کہ میں اپنے مذہب کی خاطر اداکاری اور ماڈلنگ چھوڑ رہی ہوں۔تفصیلات کے مطابق سابقہ اداکارہ کی گاڑی جیسے ہی اُن کے سیلون کے باہر آکر رُکی تو اسی دوران موٹرسائیکل سوار 2 حملہ آور آئے اور زینب جمیل پر فائرنگ کرکے فرار ہوگئے۔ حملے میں زینب جمیل کو 6 گولیاں لگیں، اُنہیں زخمی حالت میں ہسپتال لے جایا گیا جہاں اُن کا علاج جاری ہے۔واقعے کی سی سی ٹی وی فوٹیج بھی سامنے آگئی جس میں دیکھا جا سکتا ہے کہ موٹرسائیکل سوار دو حملہ آوروں میں سے ایک موٹر سائیکل سے اتر کر گاڑی کا دروازہ کھول کر فائرنگ کرتا ہے۔ویڈیو میں فائرنگ کے بعد دونوں حملہ آوروں کو فرار ہوتے بھی دیکھا جا سکتا ہے، حملہ آوروں نے کالے رنگ کے کپڑے اور چہرے پر ماسک لگار کھا تھا، زینب کی 2017ء میں شادی ہوئی تھی، وہ دو بچوں کی ماں ہیں، پولیس نے زینب کے ماموں کی درخواست پر دو نامعلوم افراد کیخلاف مقدمہ درج کر لیا۔زینب جمیل نے ہوش میں آنے کے بعد بیان دیا جس میں اُنہوں نے کہا کہ اُنہیں کچھ عرصے سے فون پر قتل کی دھمکیاں مل رہی تھیں اور اُن کے سیلون پر بھی دھمکی آمیز خط بھیجا گیا تھا۔سابقہ اداکارہ نے مزید کہا کہ وہ ملزمان کو نہیں جانتیں لیکن ملزمان پہلے سے ہی گھات لگائے ہوئے تھے، ملزمان کو پہلے ہی علم تھا کہ وہ سیلون آرہی ہیں۔دوسری جانب پولیس نے زینب جمیل کے ماموں کی مدعیت میں دو نامعلوم حملہ آوروں کے خلاف مقدمہ درج کرلیا ہے جبکہ زینب کا کہنا ہے کہ اس حملے کے پیچھے اُن کے شوہر بھی ہوسکتے ہیں کیونکہ گزشتہ دو سال سے دونوں کے درمیان اختلافات چل رہے ہیں۔اس واقعے کے حوالے سے پنجاب پولیس کا کہنا ہے کہ تحقیقات جاری ہے، ہم بہت جلد ملزمان کا سراغ لگا لیں گے۔
