پاکستان سپر لیگ (پی ایس ایل) کے چھٹے ایڈیشن کیلئے سخت کووڈ 19 پروٹوکولز بنانے کا پلان تیار کر لیا گیا جس کے تحت پی ایس ایل کے دوران ایس او پیز کی خلاف ورزی کسی طور پر برداشت نہیں کی جائے گی۔تفصیلات کے مطابق پی ایس ایل 6 کیلئے سخت کووڈ 19 پروٹوکولز کے حوالے سے تمام فرنچائزز اور دیگر سٹیک ہولڈرز کو آگاہ کیا جا رہا ہے۔ ذرائع کا کہنا ہے کہ پی ایس ایل کیلئے بائیو سکیور ببل 15 فروری سے شروع ہو جائے گا، غیر ملکی کھلاڑی ایک منفی ٹیسٹ کے ساتھ پاکستان پہنچیں گے اور کراچی میں کھلاڑیوں کی مزید دو مرتبہ ٹیسٹنگ ہوگی۔ٹیسٹنگ میں منفی نتائج آنے کے بعد ٹریننگ کی اجازت دی جائے گی، ٹیسٹ مثبت آنے والے کھلاڑی یا دیگر کسی شخص کو 5 روزہ آئیسولیشن میں رہنا پڑے گا اور آئیسولیشن کے دوران بھی دو بار ٹیسٹنگ کے مرحلے سے گزرنا پڑے گا۔ پی ایس ایل کا چھٹا ایڈیشن 20 فروری سے کراچی میں شروع ہو گا، پی ایس ایل دو مرحلوں کراچی اور لاہور میں کھیلی جائے گی جبکہ ایونٹ کا اختتام لاہور میں ہو گا۔
