پاکستان فیڈرل یونین آف جرنلسٹس نے اخبارات کے ملازمین کے لیے عملدرآمد ٹریبونل آئی ٹی این ای کے جج کی فوری تقرری کا مطالبہ کیا ہے۔پی ایف یو جے کے صدر افضل بٹ اور سیکرٹری جنرل ارشد انصاری نے ایک مشترکہ بیان میں کہا کہ آئی ٹی این ای دو سال سے زائد عرصے سے جج کے بغیر ہے جس کی وجہ سے صحافیوں کی جانب سے دائر سینکڑوں مقدمات زیر التوا ہیں۔انہوں نے کہا کہ انصاف تک رسائی میں ایک بڑی رکاوٹ ججوں کی عدم موجودگی ہے۔ انصاف تک رسائی کو بڑھانے کے لیے ججوں کی تقرری ایک مرکزی جز ہے ۔۔یہاں یہ بات قابل ذکر ہے کہ آئی ٹی این ای واحد فورم ہے جو اخبارات کی انتظامیہ اور مالکان کے خلاف صحافیوں اور میڈیا ورکرز کی شکایات کے ازالے کے لیے دستیاب ہے۔پی ایف یوجے نے افسوس کا اظہار کرتے ہوئے کہا کہ۔۔ یہ انتہائی تشویش ناک صورتحال ہے کہ اسلام آباد ہائی کورٹ کے احکامات کے باوجود آئی ٹی این ای جج کی تقرری نہیں کی جارہی جوکہ عدالتی احکامات کی خلاف ورزی ہے۔۔آئی ٹی این ای کے جج کی تقرری میں تاخیر کیوں کی جا رہی ہے؟ یہ صرف وزارت اطلاعات و نشریات کو معلوم ہے۔ نتیجتاً صحافیوں اور میڈیا ورکرز کو مالی مشکلات کا سامنا ہے۔ حکام کی جانب سے یہ لاپرواہی ناقابل برداشت ہو گئی ہے۔انہوں نے مزید کہا کہ انصاف تک رسائی قانون کی حکمرانی کا بنیادی اصول ہے۔ انصاف تک رسائی کے بغیر، صحافی اور میڈیا ورکرز اپنی آواز نہیں سنا سکتے، اپنے حقوق کا استعمال نہیں کر سکتے، امتیازی سلوک کو چیلنج نہیں کر سکتے، یا ظالموں کو جوابدہ نہیں ٹھہرا سکتے۔انہوں نے وفاقی دارالحکومت کے علاوہ ہر صوبائی دارالحکومت کراچی، لاہور، کوئٹہ اور پشاور میں آئی ٹی این ای ججوں کی تعیناتی کا بھی مطالبہ کیا۔
