عمران ریاض خان گرفتار ہوگئے۔۔

پولیس کو عمران ریاض کی گرفتاری  کئی روز سے مطلوب تھی،آخر کار پنجاب پولیس نے اسلام آباد ٹول پلازہ کے قریب معروف اینکر عمران ریاض خان کو گرفتار کرلیا۔۔ اینکر کے خلاف ملک میں سترہ سے زائد ایف آئی آرز درج ہیں، جس میں ان کی گرفتاری مطلوب تھی، عمران ریاض نے اسلام آباد اور لاہور ہائی کورٹ سے کئی مقدمات میں ضمانت قبل از گرفتاری بھی کرائی تھی،دو روز پہلے ہی عمران ریاض خان کے تمام اسلحہ لائسنس منسوخ اور وفاقی وزارت داخلہ نے ان کی بلٹ پروف گاڑی کا اجازت نامہ بھی منسوخ کردیا تھا۔۔ دریں اثنا لاہور ہائیکورٹ نے صحافی عمران ریاض خان کے خلاف بغاوت کے مقدمات کے خلاف درخواست نمٹا دی، ایڈیشنل ایڈووکیٹ جنرل پنجاب ناصر چوہان نے درخواست گزار کے خلاف درج مقدمات کا ریکارڈ پیش کر دیا، ایڈیشنل ایڈووکیٹ جنرل نے موقف اپنایا کہ درخواست گزار کے خلاف مختلف تھانوں میں 17 مقدمات درج ہیں، درخواست گزار مقدمات میں شامل تفتیش نہیں ہوا، پولیس کو درخواست گزار کی گرفتاری مطلوب ہے، وکیل درخواستگزار نے موقف اختیار کیا کہ پولیس نے مقدمات کا ریکارڈ جمع کرانے کےلئے عدالت سے مہلت طلب کر رکھی ہے، تمام ایف آئی آرز کا متن ایک ہی ہے ،کریمنل پروسیڈنگز میں حکم امتناعی جاری نہیں ہو سکتا، پولیس کی بدنیتی ہے ایک ہی دن میں اٹھارہ اسلحہ لائسنس معطل کر دئیے گئے ، سب کو پتا ہے عمران ریاض شکار بھی کرتے ہیں۔