سینئر صحافی اور دی نیوز کے ایڈیٹر انوسٹی گیشن انصار عباسی نے رانا شمیم بیان حلفی توہین عدالت کیس کی گزشتہ سماعت کی غلط رپورٹنگ پر نجی ٹی وی چینل اے آر وائی نیوز کیخلاف کارروائی کیلئے اسلام آباد ہائی کورٹ میں متفرق درخواست دائر کر دی ہے۔ جمعہ کو انصار عباسی کی جانب سے دائر درخواست میں کہا گیا ہے کہ توہین عدالت کیس کی 13 دسمبر کی عدالتی کارروائی کو نجی ٹی وی چینل نے غلط رپورٹ کیا اور میرے حوالے سے چیف جسٹس اطہر من اللہ کے غلط ریمارکس چلائے۔ متفرق درخواست کے ساتھ اے آر وائی نیوز چینل کا سکرین شارٹ بھی لگایا گیا ہے جس میں چیف جسٹس اطہر من اللہ کی جانب سے لکھا گیا کہ ”انصار عباسی کی جھوٹی خبر نے سچ کو جھوٹ کر دیا“۔ انصار عباسی نے اپنی درخواست میں کہا ہے کہ نجی ٹی وی چینل نے چیف جسٹس کے ایسے ریمارکس مجھ سے منسوب کر دئیے جو فاضل چیف جسٹس نے دئیے ہی نہیں ، عدالتی کارروائی کے دوران موجود دیگر صحافیوں نے اس کی نفی کی ہے۔ درخواست گزار اس اقدام پر نجی ٹی وی چینل کے خلاف کارروائی کا حق رکھتا ہے۔ انصار عباسی نے اسلام آباد ہائی کورٹ سے استدعا کی ہے کہ چیف جسٹس کی جانب سے مجھ سے غلط ریمارکس منسوب کرنے کے اقدام پر نجی ٹی وی چینل اے آر وائی نیوز کے خلاف نوٹس لیا جائے۔
