چیف سیکرٹری پنجاب کی جانب سے پبلک نیوز ، تجزیہ کار ارشاد بھٹی، سینئر صحافی انور سمرا اور اینکر پرسن سلمان حیدر کے خلاف این سی سی آئی میں پہلا ایکٹ کے تحت کارروائی کیلئے درخواست دے دی گئی جب کہ اس سلسلے میں عدالت سے بھی رجوع کیا جارہاہے ۔ این سی سی آئی اے نے بدھ کے روز اینکر پرسن سلمان حیدر، تجزیہ کار ارشاد بھٹی اور سینئر صحافی انور سمرا کو نوٹس جاری کرتے ہوئے طلب کرلیا۔ سی پی این ای کے صدر کاظم خان نے بتایا ہے کہ چیف سیکرٹری پنجاب کے قریبی ذرائع نے اس بات کی تصدیق کی ہے کہ انکی سرکاری رہائش گاہ واقع 9-ایکمن روڈ سے متعلقہ پبلک نیوز پر چلنے والی اسٹوری “جس میں دعویٰ کیا گیا کہ انکے لان کی تزئین و آرائش پر حکومت پنجاب نے ساڑھے 22کروڑ روپے خرچ کئے ہیں “ کیخلاف قانونی کارروائی کے لئے چیف سیکرٹری کی دستخط شدہ درخواست بعنوان قانونی کارروائی زیر دفعات پیکا ایکٹ این سی سی آئی کے دفتر جمع کروا دی ہے ۔ ذرائع نے اس بات کی تصدیق کی کہ ہتک عزت قانون کے تحت عدالت میں بھی ایک دعویٰ دائر کیا جائیگا ۔ ان معلومات کی تصدیق کے ساتھ چیف سیکرٹری آفس نے کاظم خان سے یہ سوال بھی پوچھا ہے کہ ۔۔۔ مدیران کی تنظیم کے صدر ہونے کے باعث رہنمائی فرمائیے کیا ہر مائیک پہ بولنے والا، کیمرہ کے سامنے گفتگو کرنے والا شخص صحافی ہے اور اگر ہے تو کیا اسکے پاس یہ لائسنس ہے کہ وہ بلا تصدیق ، تحقیق کسی کی عزت اچھال دے ؟ یہ بھی رہنمائی فرمائیے کہ کیا سوال پوچھنے کا حق جتانے والوں پہ لازم نہیں کہ اگر وہ دانستہ کسی کی عزت کا جنازہ نکال رہے ہیں تو اسکا ثبوت بھی مہیا کریں بصورت دیگر وہ قانونی کارروائی کا سامنا کرنے کے لئے تیار رہے ؟
یہ بھی رہنمائی فرمائیے کہ آزادی اظہار یا آزادی صحافت کے بنیادی اصولوں میں عزت اور حقوق صرف صحافیوں کے پاس ہیں ؟ امید کرتے ہیں کہ غلط بیانی کر کے کسی کی عزت یا ساکھ کو نقصان پہنچانے والوں کے خلاف اپنا قانونی حق استعمال کرنے پر آزادی صحافت کو کوئی خطرہ نہیں ہو گا ؟
