اطلاعات و نشریات کے وفاقی وزیر عطا اللہ تارڑ نے قومی اسمبلی کو آگاہ کیا کہ وفاقی حکومت صحافیوں اور میڈیا پیشہ ور افراد کے تحفظ کے لیے ایک آزاد کمیشن قائم کر رہی ہے، جس کا مقصد صحافتی آزادی کو مضبوط بنانا اور صحافیوں کے تحفظ کو یقینی بنانا ہے۔ انہوں نے یہ اعلان سوال و جواب کے سیشن کے دوران رکنِ قومی اسمبلی ڈاکٹر شرمیلا فاروقی کے اس استفسار کے جواب میں کیا، جس میں انہوں نے ملک بھر میں صحافتی آزادی پر پابندیوں اور صحافیوں کو درپیش چیلنجز پر تشویش کا اظہار کیا تھا۔تارڑ نے کہا کہ حکومت کا مقصد آئین میں دی گئی آزادیِ اظہار کی حفاظت کرنا اور صحافیوں کو ہراسانی، دھمکیوں اور تشدد کا سامنا کرنے سے متعلق بڑھتی ہوئی شکایات کا ازالہ کرنا ہے۔ عطا تارڑ کا کہنا تھا کہ کمال الدین ٹیپو کو کمیشن کا چیئرمین مقرر کیا گیا ہے، جبکہ دیگر اراکین کی تقرری کا عمل جاری ہے۔ کمال الدین ٹیپو اپنے نئے عہدے کے لیے وسیع قانون نافذ کرنے اور انتظامی تجربہ رکھتے ہیں۔ انہوں نے پولیس میں سینئر عہدوں پر خدمات انجام دی ہیں، جن میں اسلام آباد پولیس کے ڈپٹی انسپکٹر جنرل اور افریقی یونین کے لیے اقوام متحدہ کے دفتر میں پولیس پلاننگ ایڈوائزر شامل ہیں۔ وہ اس سے قبل پاکستان الیکٹرانک میڈیا ریگولیٹری اتھارٹی (پیمرا) میں بھی اہم عہدوں پر فائز رہے، جہاں انہوں نے ملک میں میڈیا ریگولیشن کے حوالے سے اہم کردار ادا کیا۔ عطا تارڑ کا کہنا تھا کہ کمیشن کو صحافیوں کو دھمکیوں، گرفتاریوں اور تشدد سے متعلق شکایات کی تحقیقات کرنے کا اختیار ہوگا اور وہ میڈیا کارکنوں کے خلاف ہونے والے تشدد کی تحقیقات اور مقدمات کے اندراج میں معاونت فراہم کرے گا۔
