سابق وفاقی وزیر اور مسلم لیگ (ق) کے مرکزی رہنما مونس الہٰی نے جاں بحق صحافی خاتون کے لواحقین کی مالی امداد بڑھانے کا اعلان کردیا۔لاہور سے جاری بیان میں مونس الہٰی نے کہا کہ پنجاب حکومت نے صحافی صدف نعیم کے لواحقین کے لیے مالی امداد بڑھا کر 50 لاکھ روپے کردی۔انہوں نے کہا کہ پی ٹی آئی چیئرمین عمران خان کی ہدایت پر پنجاب حکومت نے مالی امداد 25 لاکھ سے بڑھا کر 50 لاکھ روپے کی ہے۔قبل ازیں پنجاب حکومت نے جاں بحق خاتون رپورٹر صدف نعیم کے اہلخانہ کو 25 لاکھ روپے دینے کا اعلان کیاتھا۔۔ترجمان پنجاب حکومت مسرت جمشید چیمہ نے لاہور سے جاری بیان میں کہا کہ وزیراعلیٰ پرویز الہٰی نے صدف نعیم کے اہلخانہ کے لیے 25 لاکھ روپے کا اعلان کیا ہے۔ترجمان پنجاب حکومت نے مزید کہا کہ محکمہ ڈی جی پی آر کی طرف سے بھی صدف نعیم کے اہلخانہ کو 10 لاکھ روپے دیے جائیں گے۔مسرت جمشید چیمہ نے یہ بھی کہا کہ پنجاب حکومت مرحومہ کے بچوں کی کفالت اور تعلیمی اخراجات برداشت کرے گی۔ان کا کہنا تھا کہ سابق وزیراعظم عمران خان اور وزیراعلیٰ پنجاب چوہدری پرویز الہٰی نے پی ٹی آئی کے لانگ مارچ کے دوران عمران خان کے کنیٹنر کے نیچے آکر خاتون رپورٹر کے جاں بحق ہونے پر گہرے دکھ کا اظہار کیا ہے۔ترجمان پنجاب حکومت نے کہا کہ پنجاب حکومت اور تحریک انصاف دکھ کی گھڑی میں صدف نعیم کی فیملی کے ساتھ کھڑے ہیں۔دریں اثنا عمران خان کے کنٹینر کے نیچے آکر جاں بحق ہونے والی خاتون رپورٹر صدف کے اہلخانہ کیلئے وفاقی حکومت نے مالی امداد کا اعلان کردیا۔وزیراعظم شہباز شریف نے مرحومہ خاتون رپورٹر صدف نعیم کے اہل خانہ کے لیے 50 لاکھ کی مالی امداد کا اعلان کیا۔وزیراعظم نے متعلقہ حکام کو ضابطےکی کارروائی فوری مکمل کر کے چیک اہل خانہ کے حوالے کرنے کی ہدایت کردی۔صدف نعیم آج شام لاہور میں عمران خان کے لانگ مارچ کے دوران کنٹینر سے گر کر جاں بحق ہوگئی تھیں، جس کے بعد پی ٹی آئی چیئرمین عمران خان نے اپنا آج کا مارچ بھی منسوخ کردیا تھا۔
