تم سے ہی تعلق ہے، آج سے جیوٹی وی پر۔۔۔

پروردگار نے انسانوں کو غرور ، تکبر ، لالچ اور غصے جیسی بُرائیوں سے بچنے کی تلقین فرمائی ہے کیونکہ یہ وہ برائیاں ہیں جو کسی بھی انسان کو ایسے جنون میں مبتلا کردیتی ہیں جس میں اُس کی عقل پر پردے پڑ جاتے ہیں پھر وہ اپنے ساتھ کئی معصوم زندگیوں کو بھی داؤ پر لگا دیتا ہے۔ اِسی جنون میں کمزوروں پر مظالم کئے جاتے ہیں۔ لیکن ایک روز اُس کی ایسی پکڑ ہوتی ہے کہ وہ خود کو بھی منہ دکھانے کے قابل نہیں رہتا۔ ایسی ہی ایک دلچسپ کہانی عبداللہ کادوانی اور اسد قریشی کی زیر نگرانی سیونتھ اسکائی انٹرٹینمنٹ کی نئی میگا ڈرامہ سیریل ”تم سے ہی تعلق ہے“ میں ترتیب دی گئی ہے جو پاکستان کے سب سے  مقبول انٹرٹینمنٹ چینل ”جیو ٹی وی“ پر پیر سے باقاعدہ نشر کی جائے گی۔ واضح رہے کہ عبداللہ کادوانی اور اسد قریشی اس سے قبل بلاک بسٹر سیریل ”خانی“ بھی پیش کرچکے ہیں جس نے پاکستان کی ڈرامہ انڈسٹری میں مقبولیت کے تمام ریکارڈ توڑ کر کئی نئی اور منفرد مثالیں رقم کی ہیں۔ ”تم سے ہی تعلق ہے “ اِن کی نئی پیشکش ہے اور اُمید کی جارہی ہے کہ یہ سیریل پھر کامیابیاں سمیٹ کر انڈسٹری نیا ٹرینڈ سیٹ کرے گی۔  ”تم سے ہی تعلق ہے“ ہر پیر کی رات8 بجے جیو ٹی وی سے نشر کیا جائے گا۔(محمد ناصر)