علی عمران جونیئر
دوستو، آج ہم آپ کو ایسے نادرونایاب ”ٹوٹکے” بتائیں گے جوآپ نے کبھی سنیں ہوں گے نہ پڑھیں گے،ان ٹوٹکوں سے متعلق اب ہم یہ دعویٰ تو نہیں کریں گے کہ یہ ٹوٹکے ہمیں کئی ہزار قبل مسیح لکھے گئے تحریری نسخوں سے حاصل ہوئے ہیں،یا یہ ٹوٹکے ہم نے اہرام مصر کے تہہ خانوں میں لگی اینٹوں پر عبرانی زبان کی تحریروں کا ترجمہ کرکے حاصل کیں، نہ ہی یہ ٹوٹکے ڈائنوسارز کے زمانے کے سائیں شاہ صاحب نے بتائے ہیں، نہ ہی انگریزوں کی چھوڑی گئی ایک نشانیوں میں سے کسی ” آپا ” نے ہمیں ٹی وی پر آکر یہ ٹوٹکے سکھائے، نہ ہی یہ ٹوٹکے ہم نے نیوزچینلزکے مارننگ شوز سے کشید کئے،بلکہ یہ سارے کے سارے ٹوٹکے تو ”سینہ بہ سینہ” چلے آرہے ہیں، اور اب اسے ہم باقاعدہ تحریری شکل میں ریکارڈ پر لارہے ہیں تاکہ آپ لوگوں کے ہی نہیں آنے والی نسلوں کے بھی کام آسکیں۔۔چلیں پھر آغاز کرتے ہیں۔۔
اگر آپ کے بچے زیادہ مٹی کھاتے ہیں تو انہیں تھوڑا سیمنٹ بھی کھلا دیں تاکہ بنیاد پکی ہو جائے۔۔۔ اگر آپ اپنے غصے کو ٹھنڈا کرنا چاہتے ہیں تو ایک گلاس ٹھنڈا برفیلا پانی لیں اور سامنے جو بھی آئے اس پر پانی ڈال دیں،اب سامنے والا بندہ گرم ہوجائے گا اور آپ کو ٹھنڈا کردے گا۔۔ اگر آپ کے ہاتھ میں بہت درد ہے تو ایک مضبوط ہتھوڑی لیں اور زور سے پائوں پر مار دیں، یقین کریں آپ ہاتھ کا درد بالکل بھول جائیں گے۔۔۔۔ اگر آپ کے دانت میں کیڑا لگ جائے تو ایک دو ہفتے تک کچھ مت کھائیں پئیں، کیڑا اندر ہی بھوکا مر جائے گا۔۔۔ اگر آپ کو رات میں نیند نہیں آتی تو آنکھوں میں ایک ایک ڈراپ ایلفی ڈال لیں، آپ کو نیند بھی اچھی آئے گی اور صبح آنکھ بھی نہیں کھلے گی۔۔اگر آپ نے کہیں جانا ہے اور آپ کو نیند آرہی ہے تو آنکھوں میں مرچیں ڈالنے سے کبھی نیند نہیں آئے گی۔۔۔ اگر آپ کو زیادہ سردی لگتی ہے تو اپنے آپ پر مٹی کا تیل چھڑک کر آگ لگا لیں، اس طرح نہ سردی لگے گی اور نہ ہی کمبل کی ضرورت پیش آئے گی۔۔۔ اگر آپ کے بال سفید ہو جائیں تو سارے سر میں چونا پھیر لیں، اس طرح سارے بالوں کا رنگ ایک جیسا ہو جائے گا۔۔۔ اگر سردیوں میں آپ کے پیروں کی ایڑیاں پھٹ جائیں اور کوئی کولڈ کریم اثر نہ کرے، آپ سوئی دھاگہ لے کر اپنی ایڑیوں کو سی لیں۔۔۔ اگر آپ کو رات میں دیر تک جاگنے کی عادت ہے تو چوکیداری کر لیں، تا کہ پیسے ہی مل جائیں۔۔۔۔ مسجد کے باہر چپل رکھتے وقت ایک جوتا ایک کونے میں اور دوسرا جوتا دوسرے کونے میں رکھنے سے چپل کبھی چوری نہیں ہوتی۔۔۔۔ اگر آپ کے بال گرتے ہیں تو آپ ٹنڈ کروالیں، نہ رہیں گے بال، نہ رہے گی پریشانی۔۔
ٹوٹکے ابھی جاری ہیں۔۔سردیوں میں روزانہ صبح برفیلے پانی کی بالٹی سے نہالینے سے دن بھر سردی کا احساس نہیں ہوتا۔۔شاور بند کرکے نہانے سے جسم گیلا نہیں ہوگا،شیمپو، صابن اور پانی کی بھی بچت ہوگی۔۔ ۔ اگر گوشت میں ڈالنے کیلئے کوئی سبزی سمجھ نہ آئے تو پھر آپ بھنگڑا ”پا ” لیں۔۔ چہرے کو گلابی کرنا ہوتو دو انڈوں میں ایک سرخ مرچ پھینٹ کر چہرے پر پانچ منٹ تک مساج کرکے دھولیں، سرخی آنا شروع ہوجائے گی۔۔قد بڑا کرنا ہوتو پھانسی چڑھ جائیں۔۔سوری اس طرح تو آپ کی آنکھیں بڑی ہوجائیں گی، قدبڑا کرنا ہوتو درخت سے لٹک جائیں یا پھر اونچی ہیل کا جوتا یا سینڈل پہننا شروع کردیں۔۔قد چھوٹا کرنے کے لئے بھی ٹوٹکا حاضر ہے، لمبے قد والے لوگ روزانہ صبح نہارمنہ اٹھ کر قریبی لوہار کے پاس جائیں اور سر پر دو ہتھوڑے مروائیں جلد ہی دو فٹ قد کم ہوجائے گا۔۔جب لڑکی گھر سے بھاگنے کی دھمکی دے تو اْسے گنجا کر دو پھر وہ پانچ ماہ تک بھاگنا تو دور کی بات گھر سے نکلنے کا بھی نہیں سوچے گی۔۔۔ اگر آپ کو اپنے چہرے کا رنگ سفید کرنا ہے تو مچھلی کھانے کے فوری بعد دودھ پی لیں، رنگ سفید ہو جائے گا، اگر سفید نہ ہوا کم از کم ڈیزائن تو بن ہی جائے گا۔۔۔ اگر حکومت کپڑے پہننے پر پابندی لگا دے تو خودکش حملے بھی روکے جا سکتے ہیں۔۔ گھر کے خرچے پورے نہیں ہو رہے تو ایک بچہ داتا دربار بھیج دیں آپ کے کچن کے اخراجات نصف سے بھی کم رہ جائیں گے۔۔پیاری پیاری لڑکیوں کے لئے ٹوٹکا پیش خدمت ہے، اگر کوئی لڑکا آپ کو موبائل فون پر مسلسل تنگ کررہا ہے، میسج کررہا ہے اور کالز پہ کالز کررہا ہے تو اس سے بدلہ لینے کا آسان طریقہ یہ ہے کہ اس کا نمبر اوایل ایکس پراس اشتہار کے ساتھ ڈال دیں، آئی فون سیون صرف پانچ ہزار روپے کا،پھر وہ لڑکا خریداروں کے فون کالز سے اتنا تنگ آجائے گا کہ وہ آپ کو تنگ کرنا بھول جائے گا۔۔۔
ٹوٹکوں کی پٹاری میں ابھی درجنوں ٹوٹکے ہیں، مزید بھی جلدی جلدی نوٹ کرلیجئے۔۔اگر آپ کے کھانے پینے کی چیزوں میں مکھی گرجائے تو اسے نکال کر اتنا چوسیں اتنا چوسیں کہ کسی اور مکھی کو آپ کے کھانے کی طرف دیکھنے کی بھی ہمت نہ ہو۔۔کسی کے مرنے کی خبر ہر کسی کو نہیںدینا چاہیے، ایسا کرنے سے میت کے موقع پر پکائی گئی بریانی کم پڑ سکتی ہے۔۔۔اگر تم سے زیادہ طاقت والا شخص تم کو مارے اور تم کچھ نہ کرسکو تو تھوڑا دور کھڑے ہوکر اس پر لعنت بھیج کر بھاگ جائیں۔۔۔ گیس کے مریضوں کے لئے آزمودہ علاج بھی پٹاری سے نکل آیا ہے، جہاں پر مکان بن رہا ہو وہاں اینٹوں کو کوٹا جاتا ہے اس کے آگے لیٹ جائیں جب تین،چار ضربیں پیٹ پر پڑیں گی تو ساری گیس نکل جائے گی اور طبیعت ہلکی ہلکی سی ہوجائے گی۔۔ کافی عرصے استعمال کے بعد جب جرابوں میں بہت ہی بھیانک بدبو آنے لگے تو اْن کو اونچی دیوار پر ٹانگ دیں، اس سے گھر میں چھپکلی، مچھر اور لال بیگ وغیرہ نہیں آتے اور مہمان بھی گیٹ سے ہی واپس چلے جاتے ہیں۔۔۔ اگرچہ بڑھاپے کی اپنی برکت ہوتی ہے، لیکن خوراک وغیرہ کے مسائل کی وجہ سے اب تو بڑھاپا وقت سے بہت پہلے آ جاتا ہے اور چہرے پر جھریاں نمودار ہونے لگتی ہیں اور شوہر نامدار دوسری شادی کے بارے میں پوری سنجیدگی سے غور شروع کر دیتے ہیں۔ اس کے لیے بازار میں جو کریمیں وغیرہ دستیاب ہیں، ان کے استعمال سے جھریاں تو دور نہیں ہوتیں البتہ چہرے پر داغ دھبے اور چھائیاں ضرور نمودار ہونے لگتی ہیں۔ یعنی نماز بخشوانے جائیں اور روزے بھی گلے پڑ جائیں۔ چنانچہ اس کا واحد علاج یہ ہے کہ صبح و شام جْھریوں پر استری پھیرا کریں، تاہم استری زیادہ گرم نہ ہو جس کا اندازہ لگانے کے لیے خود ہاتھ نہ لگائیں، زیادہ گرم ہونے کی صورت میں ہاتھ جل بھی سکتا ہے، اس لیے اپنے کسی پوتے پوتی کو بہلا پھسلاکر اس کی تپش معلوم کرسکتی ہیں۔۔۔بعض اوقات جوتے کا رنگ وقت سے بہت پہلے ہی اڑ جاتا ہے، حتیٰ کہ کسی پالش کا بھی اس پر کوئی اثر نہیں ہوتا جس کی ایک وجہ تو یہ ہو سکتی ہے کہ اس پر چمڑا ہی کسی بوڑھے جانور کا لگاہو، جس سے جوتا بھی بڑھاپے کا شکار ہو جاتا ہے اور آپ اسے پہن کر محفلوں میں جانے کے قابل ہرگز نہیں رہتیں، جبکہ دیگر خواتین ایسی باتوں کا خاص نوٹس لیتی ہیں اور طرح طرح کی باتیں بناتی ہیں جو کہ حد درجہ ناقابل برداشت ہوتا ہے۔ اس لیے اس عمر رسیدہ جوتے پر مزید سرکھپانے کی بجائے اس پر لعنت بھیجیں اور بازار سے نیا جوتا خرید لیں!
اور اب چلتے چلتے آخری بات۔۔۔نصیحت کیجئے مگر نصیحت شرمندہ کرنے کے لئے نہ ہو،نصیحت کا مقصد دستک دینا ہو دروازہ توڑنا نہیں۔۔خوش رہیں اور خوشیاں بانٹیں۔۔
