تین دن کچے کے ڈاکوؤں کے ساتھ گزارے،اداکاریاسرنواز۔۔

اداکار، پروڈیوسر و ہدایت کار یاسر نواز نے انکشاف کیا ہے کہ ایک بار اہلیہ کے مارننگ شو میں آنے والے ایک پامسٹ نے اہلیہ کو بتایا کہ آپ کےتین جب کہ آپ کے شوہر کے چار بچے ہیں۔یاسر نواز نے حال ہی میں مزاحیہ پروگرام ’ہنسنا منع ہے‘ میں شرکت کی، جہاں انہوں نے مختلف معاملات پر کھل کر بات کی۔ایک سوال کے جواب میں یاسر نواز نے انکشاف کیا کہ ڈراموں میں خود سے کم عمر لڑکیوں کے ساتھ رومانس اور شادیاں کروانے کے کرداروں کی پیش کش پر انہوں نے چند ڈراموں میں کام کرنے سے بھی انکار کردیا تھا۔انہوں نے بتایا کہ نجانے کیوں پروڈیوسرز اور ہدایت کار انہیں ڈراموں میں خود سے نصف عمر لڑکیوں کے ساتھ ہیرو کے طور پر دکھاتے ہیں۔اداکار کا کہنا تھا کہ ان کے ایک بھائی ڈینٹسٹ ہیں جب کہ بہن گھریلو خاتون ہیں، باقی ان کے اور ندا یاسر کے خاندان کے تقریبا تمام افراد شوبز کا حصہ ہیں یا پہلے رہ چکے ہیں۔ان کے مطابق ان کے والد سمیت ندا یاسر کے والد، والدہ اور دونوں بہنیں بھی شوبز کا حصہ رہی ہیں۔اداکار نے اہلیہ اور اپنا ایک دلچسپ قصہ سنایا کہ ایک بار ایک خاتون نے ندا یاسر کو ان کی بیٹی سمجھ بیٹھیں اور ان کے ساتھ اداکار کی بیٹی کے طور پر تصاویر بھی بنوائیں۔ایک اور سوال کے جواب میں یاسر نواز نے بتایا کہ کچھ عرصہ قبل اپنے پروگرام میں شوہر کی دوسری شادی کروانے کی بات کہنے پر اہلیہ ان سے چار دن تک ناراض رہیں اور انہیں کہتی رہیں کہ ان کی نیت کیا ہے؟اداکار کے مطابق انہوں نے اپنے پروگرام میں مذاق میں کہا تھا کہ بیوی کو چاہیے کہ ہر پندرہ سال بعد اپنے شوہر کی دوسری شادی کروائے لیکن سوشل میڈیا پر ویڈیو وائرل ہونے کے بعد اہلیہ نے ان پر ناراضگی کا اظہار کیا۔ایک اور سوال کے جواب میں یاسر نواز نے انکشاف کیا کہ ماضی میں وہ سندھ کے چھوٹے قصبے میں ڈرامے کی شوٹنگ کرنے گئے تو وہ تین دن تک ڈاکوؤں کے ساتھ رہے۔ان کے مطابق انہوں نے شوٹنگ کے دوران وہاں کے لوگوں سے پوچھا کہ سنا ہے یہاں کچے کے ڈاکو آتے ہیں؟ وہ کب آتے ہیں اور کہاں ہیں؟اداکار نے بتایا کہ ان کے پوچھنے پر ان کے ساتھ رہنے، کھانے اور پینے والے شخص نے انہیں بتایا کہ وہ سامنے نظر آنے والے شخص ڈاکو ہیں، فلاں شخص بھی ڈاکو ہے اور میں خود بھی ڈاکو ہوں۔یاسر نواز کے مطابق مذکورہ شخص کی جانب سے خود کو ڈاکو قرار دیے جانے پر وہ حیران رہ گئے اور انہیں دیکھ کر خاموشی اختیار کرلی اور انہوں نے مذکورہ ڈاکوؤں کے ساتھ تین دن گزارے۔