معروف عالم دین اور خطیب علامہ حسن ظفر نقوی نے العارف اکیڈمی میں ایک نشست سے خطاب کرتے ہوئے کہا کہ سوشل میڈیا کا جن بے قابو ہو چکا ہے اس کے مثبت نتائج سے زیادہ منفی اثرات مرتب ہو رہے ہیں۔۔جس کی جو مرضی وہ سوشل میڈیا پر نشر کر دیتا ہے خاص طور پر مذہب اور عقائد کے معاملات کو سوچی سمجھی منصوبہ بندی کے تحت اختلافی انداز میں نشر کر کے لوگوں کو فرقہ واریت کے راستے پر ڈالا جا رہا ہے ۔انہوں نے مزید کہا کہ سوشل میڈیا کے غلط استعمال سے ہمارے معاشرے میں عدم برداشت اور خرابیاں پیدا ہو رہی ہیں اور نفرتوں میں اضافہ ہورہا ہے مگر حکمرانوں کو اس طرف توجہ دینے کی فرصت نہیں ، عوام کے درمیان فتنہ و فساد پیدا کرنے والے آزاد اور ملک دشمن طاقتوں کے ایجنڈے پر عمل پیرا ہیں اس سے پہلے کہ صورتحال بند دروازے تک پہنچ جائے سب کو سر جوڑ کر بیٹھنا اور شر پسندی کی سوچ کے خاتمے کے لئے محبت اور رواداری کو فروغ دینا ہو گا ۔
