سینئر اداکارہ سعدیہ امام نے شادی کی ایک دہائی بعد انکشاف کیا ہے کہ انہوں نے شروع میں ہی شوہر کو دوسری شادی کی اجازت دے دی تھی، کیوں کہ وہ جرمنی جانا نہیں چاہتی تھیں۔سعدیہ امام حال ہی میں شوہر کے ہمراہ ’سماء‘ ٹی وی کے مارننگ شو میں شریک ہوئیں، جہاں انہوں نے شادی سمیت تمام معاملات پر کھل کر بات کی۔پروگرام کے دوران اداکارہ اور ان کے شوہر نے بتایا کہ ان کی شادی پسند کی نہیں بلکہ خالصتا خاندان کی پسند سے ہوئی تھی۔دونوں کے مطابق وہ ایک دوسرے کو نہیں جانتے تھے، اہل خانہ نے ان کی شادی طے کی اور پہلی بار ایک دوسرے کو رشتے کی بات پکی کرنے کے وقت دیکھا تھا۔سعدیہ امام کے شوہر عدنان حیدر نے بتایا کہ چوں کہ وہ جرمنی میں کاروبار کرتے تھے، اس لیے انہیں سعدیہ امام کو کچھ پتا نہیں تھا جب کہ انہوں نے اہل خانہ کو رشتہ تلاش کرنے کا کہہ دیا تھا۔ان کے مطابق جرمنی میں ان کا ریسٹورنٹس اور گیسٹ ہاؤسز کا کاروبار ہے، ان کی خواہش تھی کہ شیعہ مسلک سے تعلق رکھنے والی خاتون سے شادی ہو۔عدنان حیدر کا کہنا تھا کہ شادی کے وقت ان کی اہلیہ کی والدہ انتقال کر گئیں جب کہ کچھ عرصے بعد ان کے والد بھی چل بسے تھے، اس لیے سعدیہ امام کو جرمنی میں قیام کرنا مشکل لگ رہا تھا، تب اگر وہ چاہتے تو دوسری شادی بھی کرسکتے تھے لیکن انہوں نے ایسا نہیں کیا۔اداکارہ نے بتایا کہ عدنان حیدر سے رشتہ طے ہونے سے قبل ان کا شادی کا کوئی ارادہ نہیں تھا لیکن والدین نے انہیں فریضہ حج کے لیے شادی کی شرط رکھی، جس وجہ سے انہوں نے شادی کی حامی بھری، کیوں کہ وہ چاہتی تھیں کہ ان کے والدین حج ادا کریں۔انہوں نے واضح کیا کہ وہ بھی شوہر کو نہیں جانتی تھیں، ان کی شادی ارینج میریج تھی، انہوں نے شوہر کو رشتہ طے کرنے کے وقت دور سے دیکھا تھا۔اداکارہ کے مطابق رشتہ طے کرتے وقت ان کے شوہر نے مَنقَبَت پڑھی اور انہوں نے ان کی آواز سن کر ہی انہیں ’قبول‘ کرلیا۔ایک سوال کے جواب میں اداکارہ نے بتایا کہ ان کے سسرال والوں کی خواہش تھی کہ ان کے ہاں جلد بچے کی پیدائش ہو لیکن ان دونوں کا ارادہ نہیں تھا۔اداکارہ کے مطابق شادی ہونے کے ایک سال بعد وہ جرمنی گئیں اور کچھ عرصے بعد حاملہ ہوگئیں، ان کا بچہ پیدا کرنے کا کوئی ارادہ نہیں تھا۔انہوں نے بتایا کہ حمل ٹھہرنے کے بعد ان کی طبیعت خراب رہنے لگی اور ان کا وزن بڑھ کر 75 کلو تک ہوگیا تھا لیکن جرمنی کے ڈاکٹرز نے ان کا ٹھیک خیال رکھا۔سعدیہ امام نے بتایا کہ انہیں جرمنی میں رہنے سے ڈپریشن ہوتا تھا، اس لیے وہ وہاں زیادہ وقت نہ رہ سکیں اور انہوں نے جرمنی میں نہ رہنے کی وجہ سے ہی شوہر کو دوسری شادی کی اجازت دے دی تھی۔ اداکارہ نے مسکراتے ہوئے بتایا کہ شادی کی اجازت ملنے کے باوجود ان کے شوہر نے دوسری شادی نہیں کی، کیوں کہ وہ پہلی بیوی کو ہی سنبھالنے میں پورے ہیں۔
