اسلام آباد ہائی کورٹ نے ایگزیکٹ جعلی ڈگری کیس میں شعیب شیخ کو ہر سماعت پر پیش ہونے کا حکم دیدیا۔ ہم نیوز کے مطابق اسلام آباد ہائی کورٹ میں ایگزیکٹ جعلی ڈگری کیس میں شعیب شیخ و دیگر کی سزا کے خلاف اپیلوں پر سماعت ہوئی،ایف آئی اے کی جانب سے شعیب شیخ سمیت دیگر کی سزا معطلی واپس لینے کی استدعاکی گئی، ایف آئی اے پراسیکیوٹر نے کہاکہ دو سماعتوں پر نہیں آتے پھر وارنٹ نکلتے ہیں تو آتے ہیں ، عدالت نے کہاکہ کرمنل معاملہ ہے ،چار پانچ سال سے اپیل چل رہی ہے اور یہ چھپن چھپائی کر رہے ہیں ،ضمانت واپس لے لیتے ہیں ان کو جیل بھیج دیتے ہیں پھر 2031 کیلئے کیس مقرر کر دیتے ہیں ۔وکیل لطیف کھوسہ نے کہاکہ پچھلی سماعت پر آرڈر ہوا تھا کہ شعیب شیخ حاضر ہو ، شعیب شیخ کو عدالت حاضری سے استثنیٰ دے ،اسلام آباد ہائی کورٹ نے ایف آئی اے پراسیکیوٹرسے استفسار کیا کہ چار سال سے یہ اپیلیں کیوں زیر التوا ہیں ؟ایف آئی اے پراسیکیوٹر نے کہاکہ پانچ جولائی 2018 کو سزا ہوئی تو یہ کورٹ سے بھاگ گئے ،ان کی ضمانت خارج ہوئی تو کورٹ سے بھاگ گئے ، عدالت نے شعیب شیخ کے وکیل کو ہدایت کراتے ہوئے کہاکہ فیصلہ کر لیں کہ کس نے بحث کرنی ہے ،مریم نواز کیس میں بھی لکھا ہے کہ کیسز زیر التوا ہونا سسٹم پر دھبہ ہے ۔اسلام آباد ہائی کورٹ نے شعیب شیخ کو ہر سماعت پر عدالت میں پیش ہونے کا حکم دیدیا،ایف آئی اے پراسیکیوٹر کی جانب سے بار بار بات کرنے کی کوشش پرعدالت نے اظہاربرہمی کیا،عدالت نے شعیب شیخ کی مستقل استثنیٰ کی درخواست پر بھی نوٹس جاری کرتے ہوئے سماعت آئندہ ہفتے تک ملتوی کردی۔
