سینئرصحافی شاہین صہبائی کا ایکس اکاؤنٹ ہیک کرلیاگیا۔۔

سینئر پاکستانی صحافی شاہین صہبائی، جو اس وقت بیرون ملک مقیم ہیں اور حکومت و عسکری اسٹیبلشمنٹ پر کڑی تنقید کرتے ہیں، نے دعویٰ کیا ہے کہ ان کا ایکس (سابقہ ٹوئٹر) اکاؤنٹ ہیک کر لیا گیا ہے۔اپنے ایک مختصر ویڈیو پیغام میں صہبائی نے خبردار کیا،میرا ایکس اکاؤنٹ ہیک کر لیا گیا ہے اور ہینڈل تبدیل کر کے رکھ دیا گیا ہے، جس کے نہ کوئی فالوورز ہیں اور نہ یہ کسی کو فالو کر رہا ہے۔ یہ اکاؤنٹ ویری فائیڈ بھی نہیں ہے۔ براہ کرم اس نئے اکاؤنٹ سے کوئی رابطہ نہ کریں۔ ہم ایکس انتظامیہ سے رابطے کی کوشش کر رہے ہیں تاکہ معاملہ حل ہو سکے۔شاہین صہبائی کا اکاؤنٹ ہیک ہونا، خاص طور پر ایک ایسے صحافی کا جو طویل عرصے سے طاقتور حلقوں پر تنقید کرتا آیا ہے، صحافتی آزادیوں اور ڈیجیٹل سیکیورٹی پر سنجیدہ سوالات اٹھاتا ہے۔صہبائی، جو ماضی میں دی نیوز انٹرنیشنل کے گروپ ایڈیٹر رہ چکے ہیں، پاکستان میں سینسرشپ اور آزادی صحافت پر پابندیوں کے خلاف کھل کر بولتے رہے ہیں۔ اس ہیکنگ کے وقت اور انداز سے ظاہر ہوتا ہے کہ یہ کارروائی اتفاقیہ نہیں، بلکہ ایک منظم کوشش ہو سکتی ہے۔شاہین صہبائی کا اصل اکاؤنٹ بحال کرنے اور تصدیق کے لیے ایکس کی سپورٹ ٹیم سے رابطے کی کوششیں جاری ہیں۔