صحافیوں کے مسائل حل کراونگا، شجاعت

پاکستان مسلم لیگ کے صدر و سابق وزیراعظم چودھری شجاعت حسین سے کراچی پریس کلب کے سیکرٹری ارمان صابر، جوائنٹ سیکرٹری ثاقب صغیر اور سیکرٹری ویجی لینس خلیل ناصر نے ان کی رہائش گاہ پر ملاقات کی۔ چودھری شجاعت حسین نے کہا کہ میں میڈیا مالکان سے بات کر کے آپ کے مسائل حل کروانے کی کوشش کروں گا۔ انہوں نے کہاکہ صحافی برادری ملک کے خیر خواہوں کو آگے لائے اور ان کی باتوں کو اہمیت دے تاکہ قوم کی صحیح رہنمائی ہو۔ کراچی پریس کلب کے عہدیداروں نے مسائل سے آگاہ کیا اور پریس کلب کے دورے کی دعوت بھی دی۔ عہدیداروں نے کہا کہ ہم آپ کے مشکور ہیں کہ آپ کے بیان کے بعد میڈیا مالکان کو ادائیگی ہوئی اور ہمیں بھی تنخواہیں ملیں لیکن بعض اداروں میں ابھی بھی 8 ماہ کی تنخواہ باقی ہے۔ چودھری  شجاعت حسین نے کراچی پریس کلب کے عہدیداروں کو بتایا کہ ان کی جماعت نے آزادی صحافت اور آزادی اظہار رائے کی جدوجہد میں ہمیشہ صحافیوں کا ساتھ دیا ہے۔انہوں نے کہا کہ میڈیا مالکان کو اشتہارات کی مد میں رکی ہوئی رقم کے اجرا میں انہوں نے اہم کردار ادا کیا ہے۔ انہوں نے کراچی پریس کلب کے وفد کو یقین دلایا کہ وہ صحافیوں کو ان کی کئی ماہ سے روکی گئی تنخواہوں کے اجراء میں بھی اپنا کردار ادا کریں گے۔اس موقع پرکراچی پریس کلب کے عہدیداروں سیکرٹری ارمان صابر اور جوائنٹ سیکرٹری ثاقب صغیر نے چوہدری شجاعت حسین کا شکریہ اداکیا۔۔