سوشل میڈیا سائٹ ٹوئٹر کے سربراہ ایلون مسک نے متعدد صحافیوں کے معطل اکاؤنٹس بحال کرنے کا اعلان کردیا۔رپورٹس کے مطابق گزشتہ روز ایلون مسک نے ٹوئٹر پر اپنے اکاؤنٹ سے ووٹنگ کرائی تھی کہ میری لوکیشن کی آگاہی دینے والوں کا اکاؤنٹ کتنے دن میں بحال کیا جائے۔ایلون مسک کی جانب سے ووٹنگ پر صارفین کو ’7 دن‘ اور ’ابھی‘ میں سے کسی ایک کا انتخاب کرنے کا آپشن دیا گیا تھا۔ٹوئٹر کے سربراہ کی جانب سے کرائے گئے پول پر 36 لاکھ 90 ہزار 639 لوگوں نے ووٹ دیے جن میں سے 58.7 فیصد لوگوں نے ’ابھی‘ جبکہ 41.3 فیصد لوگوں نے ’7 دن کے اندر‘ کا انتخاب کیا۔ووٹنگ کا نتیجہ سامنے آنے کے بعد ایلون مسک نے ٹوئٹ کر کے بتایا کہ معطل کیے گئے اکاؤنٹس کو بحال کردیا جائے گا۔ایلون مسک کا کہنا ہے کہ میری لوکیشن کی تفصیلات ظاہر کرنے والوں کے معطل اکاؤنٹس بحال کردیے جائیں گے۔رپورٹس کے مطابق ٹوئٹر کے مالک نے گزشتہ روز ذاتی معلومات ظاہر کرنے پر متعدد صحافیوں کے اکاونٹس معطل کردیے تھے جس کے بعد اقوام متحدہ اور یورپی یونین نے ایلون مسک پر تنقید کی تھی۔
