پی ایف یو جے نے سینئر صحافی وارث رضا کو حراست میں لئے جانے کے خلاف ملک گیر احتجاج کی کال دے دی، آزادی ء صحافت اور اظہار رائے کی آزادی سلب کرنے کی آمرانہ کوششیں ناکام بنانے کے عزم کے ساتھ 23 ستمبر بروز جمعرات پی ایف یوجے کی تمام ممبر یوجیز اور یونٹس پاکستان کے طول و عرض میں سراپا احتجاج ہوں گی۔ پاکستان فیڈرل یونین آف جرنلسٹس نے وارث رضا کو حراست میں لئے جانے کی مذمت کی ہے۔پاکستان فیڈرل یونین آف جرنلسٹس کے صدر شہزادہ ذوالفقار اور سیکرٹری جنرل ناصر زیدی نے ایک مشترکہ بیان میں کہا ہے کہ وارث رضا جیسے سینئر اور ذمہ دار صحافی کی گرفتاری انتہائی تشویشناک اقدام ہے۔ملک میں اس وقت ہر اس توانا آواز کو دبانے کی کوشش کی جارہی ہے جو آزادی صحافت اور آزادی اظہار رائے کے لیے جدوجہدمیں ہیں۔ انہوں نے مزید کہا کہ ایسے بزدلانہ اقدامات سے پاکستان فیڈرل یونین آف جرنلسٹس کی قیادت اور کارکن نہ کبھی خوفزدہ ہوئے نہ ہوں گے، اگر حکومت سمجھتی ہے کہ چند لوگوں کی گرفتاری یا ن کے خلاف مقدمات سے سیاہ قوانین کے لیے راہ ہموار ہو گی تو یہ ان خام خیالی ہے۔ وارث رضا اخبارات اور ٹیلی ویژن نیوز کے مختلف اداروں سے وابستہ رہے اور انہوں نے پاکستان فیڈرل یونین آف جرنلسٹس کی تاریخ اور ملک میں آزادی صحافت کی 70 سالہ جدوجہد کو کتابی شکل میں لانے کا اہم کام بطور مدیر انجام دیا، مزید وہ آزادی صحافت اور اظہار رائے کیلئے اٹھنے والی ہر تحریک میں ہر اوّل دستے کا حصہ رہے ہیں۔انہوں نے کہا کہ پاکستان فیڈرل یونین آف جرنلسٹس وارث رضا کی حراستگی کے معاملے پر ہرگز خاموش نہیں رہے گی اور ہر شہرمیں سندھ حکومت کے اس اقدام کے خلاف احتجاجی مظاہرے ہوں گے۔اگر سندھ حکومت اور متعلقہ ادارے وارث رضا کو رہا نہیں کرتے تو ہم احتجاج کو جاری رکھتے ہوئے اس کا دائرہ وسیع کریں گے۔دریں اثنا کراچی پریس کلب کے صدر فاضل جمیلی ،سیکرٹری محمد رضوان بھٹی اور دیگر عہدیداروں نے نے سینئر صحافی وارث رضا کو رات گئے گھر سے حراست میں لئے جانے کی سخت الفاظ میں مذمت کی ہے اور ان کی فوری رہائی کا مطالبہ کیا ہے ۔کراچی پریس کلب کے عہدیداروں کی جانب سے بدھ جاری بیان میں کہا گیا ہے کہ وارث رضا ایک سینئر صحافی ہیں جو پرنٹ اور الیکٹرانک میڈیا میں مختلف اداروں سے وابستہ رہے ہیں ۔ ان کی گرفتاری انتہائی تشویشناک ہے ۔کراچی پریس کلب اسے آزادی صحافت پر حملہ تصور کرتا ہے۔ انہوں نے کہاکہ ایسے اقدامات صحافیوں کو نہ پہلے دبا سکے ہیں اور نہ ہی آئندہ دبا سکیں گے۔ ہم حق و سچ کی آواز کو بلند کرتے رہیں گے۔ کراچی پریس کلب کے عہدیداروں نے مطالبہ کیاکہ سینئر صحافی وارث رضا کو فوری طور پر رہا کیا جائے۔
