ترجمان مسلم لیگ(ن) پنجاب عظمیٰ بخاری نے طبی عملے کے ساتھ صحافیوں کو بھی ترجیحی بنیادوں پر کورونا ویکسین لگانے کا مطالبہ کرتے ہوئے کہا ہے کہ طبی عملے کے ساتھ ساتھ میڈیا ورکرز بھی فرنٹ لائن پر اپنی خدمات انجام دے رہے ہیں۔نجی ٹی وی سماٹی وی کے مطابق عظمیٰ بخاری کا کہناتھا کہ بیس تیس ہزار تنخواہ لینے والے میڈیا ورکرز 12،12ہزار کی ایک ڈوز کیسے خرید سکتے ہیں،میڈیا ورکرز 30ہزار میں اپنا کچن چلائیں یا کورونا ویکسین لگوائیں،کورونا کے باعث کئی صحافی ہلاک ہوئے ہیں۔انہوں نے کہا کہ حکومت کی جانب سے صحافیوں کےلئے کورونا وباکے دوران ریلیف بھی فراہم نہیں کیا گیا۔وفاقی اور صوبائی حکومتیں میڈیا ورکرز کو ویکسین لگانے کےلئے فوری حکمت عملی بنائیں۔فرنٹ لائن پر کام کرنے والے صحافی عوام کو دن رات کورونا سے متعلق آگاہی فراہم کرنے میں سرگرم عمل ہیں اگر میڈیا کو ریاست کا چوتھا ستون سمجھا جاتا ہے تو اس کو ہر گز نظر انداز نہ کیا جائے۔
