وزارتِ اطلاعات و نشریات اور پریس انفارمیشن ڈیپارٹمنٹ (پی آئی ڈی) کے خصوصی منصوبے” پاکستان انفارمیشن سینٹر“کے زیر اہتمام انفارمیشن سروس اکیڈمی، اسلام آباد میں نوآموز اور مڈکیریئر صحافیوں کیلئے دو روزہ تربیتی ورکشاپ اختتام پذیر ہوگئی۔ اس تربیتی ورکشاپ کا موضوع” فیک نیوز اور جھوٹ پر مبنی بیانیے کا تدارک“ تھاجبکہ ورکشاپ کا مقصد شرکاء کوفیک نیوز اور منفی پراپیگنڈے کے تدارک اور اس کا توڑ کرنے کی ضرورت و اہمیت سے روشناس کرانا تھا۔ ورکشاپ کا افتتاح وفاقی سیکرٹری اطلاعات و نشریات محترمہ شاہیرا شاہد نے کیا۔ ورکشاپ کے دوسرے روز پہلے سیشن میں حسن خان نےانفارمیشن وار فیئر اور پروپیگنڈہ کے ٹولز اور پروپیگنڈہ کے تدارک کے بارے میں تفصیلی پریزنٹیشن دی اور تربیتی ورکشاپ کے شرکا ء کے سوالوں کے جوابات دیے۔ دوسرے سیشن میں مرتضیٰ سولنگی نے اشاعت سے قبل خبروں کی تصدیق اور سچائی سے کام لینے کی ضرورت واہمیت پر روشنی ڈالی اور شرکاء کو ریاست کے خلاف پراپیگنڈے کا توڑ کرنے کی حکمت عملی بارے بتایا۔تیسرے سیشن میں انفارمیشن سروس اکیڈمی کے ڈائریکٹرجنرل سعید احمد شیخ نے شرکاء کو سچی خبر کی ضرورت و اہمیت اور خبریں بنانے کے تمام ترعمل میں قومی مفادات کو مدنظر رکھنے کے بارے میں بتایا اور انہیں فیک نیوز اور جھوٹے پراپیگنڈے سے نمٹنے کیلئے موثر اقدامات اٹھانے سے متعلق آگاہ کیا۔
