لاہورپریس کلب کے صدر ارشد انصاری ، سینئر نائب صدر شیراز حسنات ، نائب صدر امجد عثمانی ، سیکرٹری زاہد عابد ، جوائنٹ سیکرٹری جعفر بن یار ، فنانس سیکرٹری سالک نواز اور اراکین گورننگ باڈی نے لاہور پریس کلب کے ممبر گورننگ باڈی نوجوان صحافی محسن بلال کی پبلک نیوز سے بلا جواز جبری برطرفی کو افسوسناک قراردیا ہے۔انھوں نے اپنے مذمتی بیان میں کہاکہ محسن بلال ایک محنتی اور پروفیشنل صحافی ہیں، ادارے کی جانب سے ایک اسائنمنٹ پر ان کی ڈیوٹی لگائی گئی جسے انھوں نے بھرپورذمہ داری سے اداکیالیکن ان کے ذمہ دفتر سے لگائی گئی اسائنمنٹ کی رپورٹ جب آن ایئر ہوئی تو ادارے نے دباﺅ میں آکر ان کی ملازمت ختم کردی جو ایک غلط روایت اوراقدام ہے جس کی بھرپور مذمت کرتے ہیں۔ انھوں نے کہاکہ ہم امید کرتے ہیں کہ پبلک نیوز انتظامیہ محسن بلال کی جبری برطرفی کے فیصلے کو واپس لیکرانھیں ادارے میں صحافتی سرگرمیاں جاری رکھنے دے گی ۔ انھوں نے مزید کہاکہ صحافی کے ساتھ ناانصافی کسی صورت برداشت نہیں کی جائے گی اور اگر محسن بلال کو بحال نہ کیا گیا تو احتجاج کا راستہ اختیارکیاجائے گا۔
