فلم انڈسٹری کے لیے 2020ء انتہائی مشکل سال ثابت ہوا ہے، جس کے آغاز میں ہی کورونا وائر س کی وبا پھیل گئی۔ملک بھر میں لاک ڈاؤن ہوا تو فلم، ڈرامہ، سنیما اور تھیٹر انڈسٹری بند کرنا پڑی، 20 سے زائد فلمیں تیار تھیں لیکن ان کی نمائش نہ ہو سکی۔چھ سات ماہ کام بند رہنے سے شوبز انڈسٹری سے وابستہ افراد گھروں تک محدود ہو کر رہ گئے، شوبز انڈسٹری اربوں روپے کے نقصان سے دوچار ہوئی۔فروری 2020 میں کورونا پاکستان پہنچا، لاک ڈاؤن، حکومتی پابندیوں اور وائرس کے خوف سے سنیما گھروں اور تھیٹرز کی رونقیں ماند پڑ گئیں، ہر قسم کی شوٹنگز بھی بند کر دی گئیں۔رواں برس فلم قائد اعظم زندہ باد، زندگی تماشا، لندن نہیں جاؤں گی اور مولا جٹ سمیت 20 سے زائد فلمیں تعطل کا شکار ہو گئیں۔فیشن شو، اسٹیج ڈرامے، ثقافتی پروگرام، نمائشوں سمیت تقریباً تمام ثقافتی سرگرمیاں رکی رہیں۔میوزک، ڈانس، اداکاری سمیت فنون لطیفہ کی دیگر اصناف سیکھنے سکھانے کے عمل کو بھی بریک لگ گئی۔سال کے آخر میں آن لائن سرگرمیوں کا آغاز ہوا جبکہ لاک ڈاؤن میں نرمی اور کورونا ایس او پیز کے ساتھ شوٹنگز بھی شروع ہو گئیں، لیکن سنیما گھر مکمل طور پر بند رہے۔
