ڈپٹی چیئرمین سینیٹ سیدال خان ناصر نے کہا ہے کہ پاکستان میں سوشل میڈیا قوانین جھوٹی خبروں کا پھیلائو روکنے کیلئے کئے ،ملک میں سیکورٹی صورتحال مستحکم ہے ، انہوں نے اپنے دو روزہ نجی دورے کے دوران سنگاپور میں مقیم پاکستانی کاروباری برادری سے ملاقات کی۔اس موقع پر ڈپٹی چیئرمین سیدال خان نے پاکستان میں موجود بے پناہ سرمایہ کاری کے مواقع، خصوصاً بلوچستان کے معدنیات اور کان کنی کے شعبے میں سرمایہ کاری کے امکانات پر روشنی ڈالی۔ مزید برآں، سیدال خان نے پاکستانی کاروباری شخصیات کی جانب سے سوشل میڈیا قوانین سے متعلق اٹھائے گئے خدشات کا بھی جواب دیا۔ انہوں نے وضاحت کی کہ یہ قوانین افراد کی پرائیویسی کے تحفظ اور جھوٹی خبروں کے پھیلاؤ کو روکنے کے لیے وضع کیے گئے ہیں۔ اس کے ساتھ ہی، انہوں نے ملک میں انٹرنیٹ خدمات کی بہتری کے لیے حکومت کی جاری کوششوں پر بھی روشنی ڈالی۔
