یوکے کمپنیز ہائوس نے نازیہ حسن فائونڈیشن (این ایچ ایف) کو چیرٹیبل آرگنائزیشن چلانے کے ذمہ دار ٹرسٹیز اور گلوکارہ نازیہ حسن کے ورثے کو آگے بڑھانے میں غفلت برتنے اور قانونی تقاضے پورے کرنے میں ناکامی کے بعد تحلیل کر دیا۔ چیریٹز ریگولیٹر دی چیرٹی کمیشن نے جیو اور جنگ کو تصدیق کی ہے کہ اس نے چیرٹیز رجسٹر سے نازیہ حسن فائونڈیشن کو ریموو کرنے کیلئے پراسس شروع کر دیا ہے۔ یوکے کمپنیز ہائوس میں دستیاب ریکارڈز سے پتہ چلتا ہے کہ نازیہ حسن فائونڈیشن کے ٹرسٹیز تقریباً 1000 دنوں سے چیرٹی کی سالانہ رپورٹس جمع کرانے میں ناکام رہے ہیں۔ گلوکارہ کے انتقال کے دو سال بعد این ایچ ایف کا قیام 2003 میں ایک چیرٹی کے طور پر ایک لمیٹڈ کمپنی کے ذریعے ضمانت کے ساتھ عمل میں آیا تھا۔ نازیہ حسن کے بھائی زوہیب حسن نے رپورٹر کو بتایا کہ اس فائونڈیش کو ان کی والدہ منیزہ بصیر چیئرپرسن کی حیثیت سے چلاتی تھیں لیکن جب سے ان کی طبعیت ناساز ہوئی تو ہم نے اس وقت سے اس کو برطانیہ میں غیر فعال کر دیا تھا۔ تاہم یو کے رجسٹر آف کمپنیز سے پتہ چلتا ہےکہ نازیہ حسن فائونڈیشن غیر فعال نہیں ہے اور اسے کمپلسری سٹرائیک آف کے ذریعے تحلیل کیا گیا۔ چیرٹی کمیشن کے ترجمان نے اس نمائندے کو ایک بیان میں کہا کہ چیرٹی کے ٹرسٹیز چیرٹی کمیشن کے پاس قانونی تقاضے کے مطابق سالانہ گوشوارے چمع کرانے میں ناکام رہے اور اس چیرٹی کو چیرٹیبل کمپنی کی حیثیت سے تحلیل کردیا گیا ہے اور اب کمیشن اسے رجسٹر آف چیرٹیز سے ریموو کرنے کا پراسس شروع کر رہا ہے۔
