پنجابی فلموں کا تسلسل شروع کرناہوگا،صائمہ۔۔

اداکارہ صائمہ نور نے کہا ہے کہ ”للکارا سنگھ“کامیاب فلم ثابت ہوگی۔ایک سوال کے جواب میں صائمہ نور نے کہا کہ نئی پنجابی فلمیں نہ بننے کی وجہ سے لاہور کی انڈسٹری جمود کا شکار ہو چکی ہے۔ انہوں نے کہا کہ سب کو مشترکہ پلیٹ فارم تشکیل دے کر پنجابی فلموں کا تسلسل شروع کرنا ہو گا اور کم از کم سالانہ 10 سے12 فلموں کی نمائش سے پنجابی فلموں کا دور واپس آسکتا ہے۔ آج بھی ہماری انڈسٹری میں ایسے ہدایتکار موجود ہیں جو کسی بھی فلم کی کامیابی کی علامت سمجھے جاتے ہیں،مگر اس کیلئے سرمایہ کاروں کو ایک قدم آگے آنا ہو گا،خالی باتوں سے کبھی منصوبے مکمل نہیں ہوتے۔ انہوں نے کہا کہ جب تک عملی طور پر قدم نہیں اٹھایا جائے گا تب تک اسی طرح کنارے پر کھڑے رہیں گے۔ اداکارہ صائمہ نے مزید کہا کہ ،میں فلم انڈسٹری کے حالا ت سے مایوس نہیں ہوں۔