پی ٹی وی سپورٹس کے ٹھیکوں میں اربوں روپے من پسندکمپنیوں کو دیے جانے کا انکشاف ہوا ہے۔ اربوں روپےکے نقصان، قاعدے قانون کی خلاف ورزیوں پرکارروائی کا فیصلہ کیا گیا ہے۔جیو نیوز کے مطابق محکمانہ فیکٹ فائنڈنگ رپورٹ کے مطابق من پسند کمپنیوں کوخلاف ضابطہ ٹھیکے دیے گئے، من پسند پارٹیوں کے ٹیکس بھی معاف کیے گئے، قومی خزانے اور خسارے کا شکار پی ٹی وی کو اربوں روپے کا نقصان ہوا۔رپورٹ کے مطابق سابق وزیراعظم عمران خان کے براہ راست حکم پر غیرقانونی کام کیے گئے، پی ٹی وی اسپورٹس کے ٹھیکے دینے کے وقت وزیر اطلاعات فواد چوہدری تھے۔پی ایس ایل 7، 8 اور ورلڈکپ کے ٹھیکوں میں مالی اور قانونی جرائم کا ارتکاب کیا گیا، پیپرا رولز، پی ٹی وی بورڈ کے قواعد و ضوابط کی دھجیاں اڑائی گئیں، ٹھیکوں کی بولی کا عمل نقائص سے بھرپور اور غیر شفاف تھا۔جائز بولیاں دینے والوں کو غیر شفاف طریقے سے دانستہ طور پر مسابقتی عمل سے باہر کیا گیا۔ذرائع کا یہ بھی کہنا ہے کہ مشکوک، مینوپلیٹڈ طریقہ کار اپنانے سے پی ٹی وی کو بھاری مالی نقصانات ہوئے،تمام کمپنیوں کو مقابلےکا منصفانہ ماحول فراہم نہیں ہوا، اس عمل سے پی ٹی وی کو بھاری مالی نقصانات ہوئے۔قواعد کے برعکس پی ٹی وی سپورٹس کے کنٹریکٹس دینے اور اربوں روپے کی ادائیگیوں پر قانونی کارروائی کا آغاز کردیا گیا ہے، ایف آئی اے نے فیکٹ فائنڈنگ رپورٹ سمیت دیگر اہم شواہد اور ریکارڈ حاصل کرلیا ہے، ایف آئی اے نے پی ایس ایل کے ٹھیکوں کا ریکارڈ بھی حاصل کرلیا ہے۔
