پی ٹی وی کو نیا چیئرمین مل گیا

وفاقی وزیر اطلاعات فواد چوہدری کا کہنا ہے کہ وفاقی کابینہ نے ارشد خان کو چیئرمین پی ٹی وی اور جسٹس عبدالراؤف کو ویج بورڈ کا چیئرمین مقرر کرنے کی منظوری دے دی جبکہ وفاق کے اطلاعات تک رسائی قانون کو مزید مضبوط بنایا جائے گا۔ صحافیوں کو بریفنگ دیتے ہوئے انہوں نے بتایا کہ وفاقی کابینہ نے یہ بھی فیصلہ کیا ہے کہ اطلاعات تک رسائی کے قانون کو مضبوط بنایا جائے جس طرح خیبرپختونخوا میں ایک مضبوط اور موثر اطلاعات تک رسائی قانون ہے اسی طرح وفاق میں بھی لایا جائے، اطلاعات تک رسائی بل سے میڈیا کو بھی معلومات کے حصول میں سہولت مل سکے گی۔ انہوں نے ایک سوال کے جواب میں کہا کہ  ، پرنٹ میڈیا اشتہارات کے لئے حکومت نے کوئی ایسی کمیٹی نے نہیں بنائی تا ہم سی پی این ای اور اے پی این ایس سے یہ تجاویز مانگی ہیں کہ بتایا جائے کہ اشتہارات کا اجراءشفاف بنانے کے لئے کیا کیا جائے ،ہمیں کہا گیا کہ تمام اشتہارات پی آئی ڈی کی ویب سائٹ پر اپ لوڈ کیے جائیں تو وزارت اطلاعات و نشریات نے اس کو یقینی بنادیا۔۔