جوائنٹ ایکشن کمیٹی کی پاکستانی صحافیوں کے دورہ اسرائیل کی مذمت

کراچی پریس کلب کی جوائنٹ ایکشن کمیٹی میں شامل پاکستان کی تمام بڑی صحافتی تننظیموں نے پاکستانیوں صحافیوں کے حالیہ دورہ اسرائیل کی سخت الفاظ میں مذمت کرتے ہوئے اسے اسرائیلی جنگی جرائم پر پردہ ڈالنے کی کوشش قرار دیا ہے ۔صدر کراچی پریس کلب فاضل جمیلی کی قیادت میں قائم جوائنٹ ایکشن کمیٹی نے اس دورے پر اپنے غم و غصے کا اظہارکرتے ہوئے مشترکہ بیان میں کہا کہ صحافیوں کا یہ دورہ فلسطینیوں کے خلاف اسرائیل کی جاری وحشیانہ جارحیت کے  دوران ہوا ہے۔اسرائیلی فورسز  150سے زیادہ صحافیوں کو سچ بے نقاب کرنے پرشہید بھی کرچکی ہے ۔ انہوںنے کہا کہ دورے میں حصہ لینے والے صحافی پاکستان کی صحافتی کمیونٹی کی نمائندگی نہیں کرتے اور یہ ان کا انفرادی فعل تھا ۔صدر کراچی پریس کلب فاضل جمیلی نے کہا کہ ہم فلسطینی کاز کے لیے اپنی غیر متزلزل حمایت کے عزم کا اعادہ کرتے ہیںاور نسلی تصفیہ میں مصروف  اسرائیلی حکومت کے ساتھ حالات کو معمول پر لانے کی کسی بھی کوشش کی مذمت کرتے ہیں۔انہوں نے مزید کہا کہ پاکستا ن کے صحافی مظلوم لوگوں کے دکھ کو اجاگر کرنے میں ہمیشہ پیش پیش رہے ہیں اور ہم اس کے لیے کسی بھی ٹھوس اقدام سے باز نہیں آئیں گے۔سیکرٹری کراچی پریس کلب سہیل افضل خان  مطالبہ کیا کہ اس بات کی تحقیقات کی جائے یہ افراد کس طرح اسرائیل کا دورہ کرنے میں کامیاب ہوئے۔ پاکستانی شہریوں کے اسرائیل کے سفر پر پابندی عائدہونے  کے باوجوداس طرح کا دورہ پاکستانی قانون اور خارجہ پالیسی کے موقف کی کھلم کھلا خلاف ورزی ہے، اس کی مکمل جانچ پڑتال کی جائے اور ذمہ داروں کا احتساب کیا جائے۔جوائنٹ ایکشن کمیٹی نے پاکستان کی تمام میڈیا تنظیموں سے مطالبہ کیا ہے کہ وہ اپنے انصاف اور انسانی حقوق کے اصولوں پر قائم رہیں اور اسرائیل کے مظالم کو معمول پر لانے والے کسی بھی اقدام کی مذمت کریں۔