پرنٹ میڈیا کو اشتہارات کی بندش پر تشویش

بلوچستان ڈیلی نیوز پیپرز ایڈیٹرز کونسل نے حکومت بلوچستان کی جانب سے پرنٹ میڈیا کو اشتہارات کی مکمل بندش پر شدید ردعمل کا اظہار کرتے ہوئے اسے جان بہ لب انڈسٹری پر قاتلانہ حملہ قرار دیا ہے۔ ایک بیان میں کہا گیا ہے کہ وفاق کی جانب سے ایک مبہم فیصلے کے بعد بلوچستان کی بیورو کریسی نے شاہ سے زیادہ شاہ کی وفاداری دکھا کر ایک سنگین قدم اُٹھایا ہے، بیورو کریسی کے سخت اور غیر منصفانہ رویئے کی وجہ سے بلوچستان کے اخبارات کافی عرصے سے زندگی اور موت کی کشمکش میں مبتلا ہیں طے شدہ پالیسی کے تحت ایک طرف اخبارات کے بل ادا نہیں کئے جارہے ہیں اور دوسری طرف ایک مبہم فیصلے کی آڑ لے کر بیورو کریسی اشتہارات کی بندش کے ذریعے صوبے کی اخباری صنعت کے تابوت میں آخری کیل ٹھونکنا چاہتی ہے بیان میں کہا گیا کہ وفاق کی جانب سے تین صوبوں کو ڈکٹیٹ کرنا کہ میڈیا کو اشتہارات جاری نہ کئے جائیں صوبائی خود مختاری میں مداخلت اور آئین کی سراسر خلاف ورزی ہے ۔۔