پریس کلب کا الیکشن، میڈیا مالکان کھل کر سامنے آگئے۔۔

تحریر: شہباز انور خان۔۔

لاہور پریس  کلب کے  انتخابات   برائے سال   2021  ء   مکمل  ہو گئے،جن میں  صحافیوں  کی  قابلِ ذکر تعداد نے  اپنا  حق  رائے  دہی  استعمال  کرتے  ہوئے  اگلے ایک  سال  کے لیے  کلب  کے عہدیداروں کا  چناوٗ  کر  لیا  ہے۔یہ  انتخابات  پورے  جمہوری عمل کے  ساتھ  انعقاد پذیر  ہوئے ،ان  انتخابات  کے لیے  ابتدائی  طور پر  سینئر  صحافی  محترم جناب  سلیم  بخاری  کو  چیئرمین  الیکشن کمیٹی  نامزد  کیا  گیا  تھا  لیکن انتخابات  سے  قبل   اُنہو ں نے  ان  انتخابات  میں حصہ  لینے  والے  ایک  امیدوار  کو  اپنا  نمائندہ  قرار  دیتے  ہوئے  ان کو سپورٹ کرنے کی بات کی تھی  جس کی وجہ  سے  ان کا  چیئرمین  الیکشن کمیٹی کے  طورپر  کردار  متنازعہ  ہو  گیا(جس  کی  چند  سینئر  صحافیوں  نے نشاندہی  بھی کی ) چنانچہ  انصاف  اور جمہوری تقاضوں  کو  بروئے کار  لاتے  ہوئے جناب سلیم بخاری  نے رضاکارانہ  طورپر  بطور  چیئرمین  الیکشن کمیٹی  کردار ادا  کرنے سے معذوری  ظاہر کرتے  ہوئے  انتخابی عمل  سے علیحدگی  اختیار  کرلی جو  اُن  کے کردار  کی پختگی  پر دال ہے۔

ان کے  بعد  ایک  دوسرے  سینئر  صحافی  شفیق  اعوان  کے نام  پر  قرعہ پڑا  جنہوں نے  نہ  صرف  یہ  ذمہ داری  سنبھالنے پر  آمادگی  ظاہر کی بلکہ  اپنے  فرائض  بھی  پورے  احساسِ    ذمہ داری  کے ساتھ  انجام دیے ۔  انہوں  نے اپنی ٹیم  کے سا  تھ  مل  کر  انتخابات  کو  شفاف ، غیر  جانبدارانہ  اور  منصفانہ  کروانے  کے لیے  فول  پروف  انتظامات  کیے  تھے ۔یہ  انہی  انتظامات  کا  نتیجہ  اور ماحصل ہی  ہے  کہ  جیتنے والوں  ہی نے نہیں ہارنے  والوں نے  بھی  ان پر کلی  اعتماد  کااظہار  کرتے  ہوئے  نتائج کو کھلے  دل کے ساتھ  قبول کیا  ہےجس  پر  شفیق  اعوان اور  ان کی  پوری ٹیم  بلا شبہ  بجا  طورپر تحسین کی حقدار  ٹھہرتی  ہے۔

لاہور پریس کلب کے حالیہ  انتخابات  میں تین گروپوں   جرنلسٹ   گروپ ،  پروگریسو  گروپ  اور  ڈیموکریٹک  (گرینڈ الائینس)   نے  حصہ  لیا ۔ تینوں  گروپوں  نے بھرپور انداز میں مہم  چلائی اور وسائل  بھی  استعمال کیے اور  پھر  اسی  نسبت  سے ووٹ  بھی  حاصل  کیے ۔جرنلسٹ  گروپ اور  پروگریسو  تو  پہلے  ہی سے موجود تھے لیکن اس  مرتبہ  رائے  حسنین  طاہر  کی قیادت  میں ڈیموکریٹک  گروپ  خاصہ  متحرک  رہا۔ سابق سیکرٹری پریس کلب  بابر  ڈوگر  اس گروپ  سے  آ ملے  اور صدارتی  امیدوار بنے،اس کے علاوہ زاہد  شفیق طیب  کے رائٹرز گروپ اور  قاضی طارق  کے  فرینڈز  گروپ  نے بھی  اس کے ساتھ اتحاد  کرلیا   جبکہ  آصف جیلانی نے ان  سب گروپوں سے الگ تھلگ  رہ کر انفرادی  حیثیت میں الیکشن لڑا  اور  91 ووٹ حاصل کرنے میں کامیاب ہوگئے۔اعلان کردہ  نتائج کی  رو  سے  مطابق  ارشد  انصاری  کی  قیادت میں  جرنلسٹ  گروپ نے نمایاں  کامیابی حاصل کی جس  کے لیے  بجا  طور  پر  وہ مبارک باد کے  مستحق ہیں۔

اس  مرتبہ انتخابات  میں ایک اہم  بات  یہ دیکھی گئی  کہ  شہر کے ایک میڈیا  گروپ  نے اعلانیہ طورپر  ایک امیدوار کو  اپنا  امیدوار بنا کر  پیش کیااور  پورے   میڈیا گروپ نے ان کی انتخابی  مہم  ”فرض  ِ  منصبی “  سمجھ کر  چلائی۔ اس سے پہلے  شہر  کے دو  بڑے  میڈیا  گروپس  بھی اپنے  اپنے  نامزد   امیدواروں  کے حق میں درپردہ   طورپر مہم  چلاتے  رہے  ہیں۔ یوں  پہلی  مرتبہ  پریس  کلب کے انتخابات میں میڈیا مالکان کھل کر  سامنے  آئے  اور کلب  کی سیاست میں اپنا کردار منوایا۔

یہ الگ  بات ہے  اس رویے  کو سنجیدہ  فکر  اور  جینوئن  صحافیوں نے ناپسندیدہ  قرار دیا  ہے۔اس کی بڑی   اور بنیادی  وجہ یہ ہے  کہ گزشتہ چند برسوں  سے  کارکن صحافیوں  کی نمائندہ  تنظیموں پاکستان فیڈرل  یونین  آف  جرنلسٹس  اور  صوبائی سطح پر  قائم  بیشتر یونین  آف  جرنلسٹس  پر  ایسے  لوگ  بھی  غالب  آ گئے   جو  بدقسمتی  سے صحافی  سے زیادہ  دیہاڑی باز  تھے۔اِن  کے اِن  غیر جمہوری  اور مفاد پرستانہ رویوں  کے باعث  یہ تنظیمیں  رفتہ رفتہ  اپنا  تشخص کھوتی  چلی گئیں اور  آج یہ  مکمل طورپر اپنی  اہمیت گنوا چکی  ہیں،اس لیے اب  ان کی جگہ منطقی  طور پر پریس کلبوں نے لے لی ہے، سو  اِن  حالات  میں  مالکان  کی نظر میں بھی  لامحالہ  طور پر صحافی  تنظیموں  کےمقابلے میں پریس کلبوں  کی اہمیت بڑھ  گئی ۔پہلے صحافی تنظیمیں  ہی  بارگیننگ  ایجنٹ کا  کردار ادا  کرتی تھیں  اور  مختلف  فورمز  پر   صحافیوں  کی  نمائندگی  کا فریض  انجام دیتی  تھیں۔ماضی  میں  ملک  میں  آمرانہ اورجمہوری  ادوار  میں  جب  کبھی  آزادیء  صحافت  پر  حملہ  ہوا  یا  آزادیء رائےپر پابندیاں لگیں  تو پریس  کلبیں  نہیں  یہی  صحافی  تنظیمیں  ہی  تھیں  جنہوں نے  جنگ  لڑی  اور  استحصالی  قوتوں  سے  براہ  راست  ٹکر  لے کر  انہیں   گھٹنے  ٹیکنے پر  مجبور  کردیا ، اس  کی  بنیادی   وجہ  یہ  تھی  کہ  یہ  دھڑے نہیں  تنظیمیں  تھیں  اور  متحد  تھیں لیکن آ ج  حالت یہ  ہے  کہ یہ  دھڑوں میں  بٹ  کر  اور  اپنی  غیر فعالیت  اور غیر  صحافیانہ  کردار کی  وجہ سے  کوئی  حیثیت نہیں  رکھتیں اور   یہ  مقام اب پریس کلبوں  کو  حاصل  ہو  گیا ہے۔

یہ  صورت  حال  ظاہر ہے  صحافت  اور اہلِ   صحافت  کے لیے  کسی  صورت بھی خوش  آئند  اور نیک فال  نہیں  ہوسکتی ۔یہ ہی وجہ  ہے کہ  گزشتہ دو  برسوں کے دوران جب  میڈیا  کے لیے سرکاری  اشتہارات  بند  ہوئے  اور  مالی طورپر انہیں  نقصان  برداشت کرنا پڑا  تو انہوں نے  اپنا  نقصان  اپنے ملازمین  کی  طرف منتقل کردیا چنانچہ   ہزاروں صحافی بعض  استحصال  پسند  مالکان  کے خود  غرضانہ اور  مفاد پرستانہ کردار کا نشانہ  بن کر ملازمتوں  سے  محروم  ہو کر  بیروزگاری  کی زندگی بسر کرنے پر مجبور  کردیے گئے ہیں۔جو  ان  اداروں میں  ابھی تک کام  کررہے ہیں  ان کی تنخواہوں میں کٹوتیا ں  کردی گئی ہیں  لیکن  مالکان کے اس سفاکانہ عمل کے خلاف  صحافیوں کی کسی  تنظیم نے  بھی موثر  کردار  ادا نہیں کیا۔ جن  تنظیموں  نے  صحافی برادری  کی  وکالت کرنی  اور  ان  کے حقوق کا تحٖفظ  کرنا  تھا  وہ  الٹا  مالکان  کی   نمائندہ بن  گئیں ۔ یوں آج یہ  کارکن صحافی خود کو لاوارث  تصور کررہے ہیں،ان کا کوئی  پرسانِ    حال  نہیں  ہے۔

سو اِن  حالات میں ضروری ہےکہ  درد  مند  دل  رکھنے والے  ملک کےسنجیدہ  فکر سینئر صحافی  صحافت  اور اہلِ    صحافت کو مزید  بے وقعت  ہونے اور ناقدری سے  بچانے  کی غرض  سے رسمِ شبیر ی  ادا  کرنے کے  لیے  میدان   ِ عمل میں اتریں۔ اس سلسلے  میں اگرچہ  پہلے بھی  کوششیں  ہو چکی ہیں اور  بزرگ صحافی  محترم جناب حسین نقی صاحب کی سربراہی میں  سینئر  صحافیوں  پر مشتمل  ایک  کمیٹی  نے پی ایف یو  جے  اور  یو جیز کے نام  سے قائم  مختلف  دھڑوں  کو متحد کرنے کے لیے سعی ٗ مشکور  کی لیکن  بعض  مفاد  پرستوں  کے مخاصمانہ  رویے اورعدم  تعاون کی بنا پر یہ  بیل منڈھے  نہ چڑھ سکی۔ نتیجتاً  کوششیں  کرنے والے سینئر  صحافیوں نے  آخر کار مایوسی کے عالم میں  یہ بھاری  پتھر  چوم کر چھوڑ دیا لیکن پنجابی کے ایک محاورے کے مطابق “اب  بھی گرے  ہوئے  بیروں  کا کچھ نہیں بگڑا”  اب بھی نئے سرے سے  صحافی  تنظیموں کی بحالی کی کوششیں دوبارہ شروع کی جاسکتی ہیں۔

 وقت کا  لازمی  تقاضا  ہے کہ  مفاد پرست  مالکان  کے ٹاؤٹوں اور  دیہاڑی بازوں  کے لیے اب میدان خالی نہ چھوڑا جائے ۔اس  میں کوئی شک  نہیں  ہے کہ  صحافیوں کی شکل میں ان  مافیا ز کی تعداد بہت کم ہے  جنہوں نے  اپنے مفادات  کےلیےان  تنظیموں  کو  یرغمال  بنا  رکھا  ہےجبکہ  اس کے  مقابلے  میں  اصلی  اور جینوئن  صحافی  کہیں زیادہ  ہیں  جو چاہتے ہیں  کہ  صحافیوں کی نمائندہ  تنظیمیں  اصلی  حالت  میں بحال  ہوں   اور ان کی حقیقی ترجمانی کا خوش گوار  فریضہ انجام دیں۔اس وقت جب کہ  صحافت  اور اہل  صحافت   مختلف نوع کے مسائل اور  مشکلات  کا شکار ہیں، ملکی اور قومی  سطح پر انہیں  بہت سے  چیلنجز   کا سامنا  ہے،  ایک مضبوط  اور  حقیقی  صحافی  تنظیم کا وجود  اَزبس  ضروری ہے۔اس مقصد کے لیے چند سینئر ، غیر جانبدار  اور اجلے  کردار کے  حامل صحافیوں پر مشتمل کمیٹی  بنائی جاسکتی ہے جو   تمام  صورت  حال  کا جائزہ  لے  کر  اس ٹاسک  بلکہ نوبل  کاز  کے لیے  بروئے کار  آئے،  جو صحافیوں کی نئے  سرے سے صف بندی  کرے ،  تمام  سٹیک ہولڈر ز  کے ساتھ مشاورت کے ساتھ  رہنما  اصول  وضع  کرے  اور  پھر  آئین  اور  دستو ر  کی  روشنی  میں  آزادانہ ، شفاف  اور منصفانہ  انتخابات  کا ڈول ڈالا جائے  اور  پھر  ان  انتخابات  کے نتائج   کی  رو  سے   “حق  بہ حقدار  رسید”  کے مصداق  تنظیموں  کی قیادت  اصل حقدار  اور  جینوئن  منتخب  لوگوں  کے سپرد کی جائے۔صرف  اسی صورت  میں صحافت  اور اہلِ صحافت کا وقار قائم  کیا جاسکتا ہے ،  انہیں  معاشرے  میں بھی اسے  جائز  مقام  مل سکتا ہے  اور  ریاست  کے چوتھے  ستون کی  حیثیت سے موثر  کردار ادا کیا جاسکتا ہے۔ آج  کے  نامساعد  حالات  اور  مشکل ترین  ماحول  میں  پریس  کلبیں  نہیں  نمائندہ صحافی  تنظیمیں  ہی  صحافت  اور صحافیوں  کے  حقوق  کی  نگہداشت بہتر  انداز میں کرسکتی  ہیں ۔  سو ” اب  یا  پھر کبھی  نہیں“  کے  مصداق  وقت  آ گیا  ہے کہ  اس  ضمن میں  ٹھوس  انداز میں قدم  اٹھایا  جائے  اور   کارکن  صحافی  اپنے  اندر  اتحاد  پیدا  کرکے  اپنی صفوں  میں  موجود  کالی  بھیڑوں  کو نکال  با ہر  کریں  اور ایک  نمائندہ  تنظیم  کے قیام  کو یقینی بنائیں۔  یہ کام  مشکل  اور دقت طلب  ضرور ہے  لیکن ناممکن  نہیں، اگر نیک نیتی  اور  اخلاص  کے ساتھ  قدم  اٹھائے  جائیں تو کامیابی  یقینی  ہے۔(بشکریہ پاکستان)