پاکستان میڈیا ڈیویلپمنٹ اتھارٹی پر غور کے لیے پاکستان میڈیا تھنک ٹینک کے زیر اہتمام میڈیا سے متعلق قانونی مسودے سے متعلق ایک مشاورتی اجلاس ہوا جس میں پی ایف یو جے (دستور) کے صدر نواز رضا، آر آئی یو جے(دستور) کے فنانس سیکرٹری مرزا عبد القدوس کے علاوہ سنیئر صحافی ظفرملک، فاروق عادل، اعجاز احمد اور ضرار خان شریک ہوئے، اجلاس میں پی ایف یو جے (دستور) کے اسسٹنٹ سیکرٹری محمد شعیب اور سینئر صحافی محمد اجمل نے ویڈیو کال کے ذریعے شرکت کی، اجلاس میں سپریم کورٹ کے سینئر قانون دان پاکستان پریس کونسل کے سابق چیئرمین ڈاکٹر صلاح الدین مینگل(تمغہ امتیاز) نے اس آرڈینیس پر اپنی قانونی رائے دی اور کہا کہ آئین میں دیئے گئے انسانی حقوق کے منافی قانون سازی نہیں ہوسکتی ، اخبار نوسیوں کے ہاتھ میں قلم کی طاقت ہے اور وہ اپنے جذبات اور احساسات کا اظہار قلم کے ذریعے کر سکتے ہیں، میڈیا کے لیے جب بھی کوئی قانون بنایا جائے تو بہتر یہی ہوتا ہے کہ تمام فریق مشاورت میں شامل کیے جائیں اور کارکن صحافیوں کے مسائل کے حل کے لیے قانونی تحفظ فراہم کرنا بہت ضروری ہے، محمد شعیب نے کہا ہم کارکن صحافیوں کے مسائل کے حل کی بات کرتے ہیں اور انہیں تحفظ دلانا چاہتے ہیں، پی ایف یو جے(دستور) کے صدر نواز رضا نے کہا کہ پی ایف یو جے (دستور) اس قانونی مسودے کو مسترد کرچکی ہے اور ہم پی ایف یو جے (دستور) کے پلیٹ فارم سے صحافیوں کے حقوق کے تحفظ کے لیے ہر سطح پر جدوجہد کریں گے اور کارکن صحافیوں کے مسائل کے حل کے لیے ہر جائز طریقے سے کوششیں اور جدوجہد جاری رکھیں گے۔
