اپوزیشن نے اسلام آباد ہائیکورٹ کی جانب سے پیکا آرڈیننس کو کالعدم قرار دینے کےفیصلے کاخیرمقدم کیاہے، مسلم لیگ (ن) کی ترجمان مریم اورنگزیب نےکہا ہے کہ اسلام آباد ہائیکورٹ نے آئین کی سربلندی کا فیصلہ دیاجو لائق تحسین ہے ، پاکستان کے صحافیوں، سول سوسائٹی، میڈیا اداروں اور عوام کو مبارکباد پیش کرتے ہیں،پی بی اے، اے پی این ایس، سی پی این ای، پی ایف یوجے اور ایمینڈ کو حق کی فتح مبارک ہو، عدلیہ نے فیصلہ دیدیا ہے کہ کوئی میڈیا اور عوام کو اندھا، بہرہ اور گونگا نہیں بناسکتا، آئین میں دی گئی شہری آزادیوں اور اظہار رائے کا تحفظ دستور اور جمہوریت کا تحفظ ہے، پیکا ترمیمی آرڈیننس عمران کی فسطائیت اور آمریت کا اظہار تھاجو انجام کو پہنچا، اعلیٰ عدلیہ نے آئین کے محافظ، پاسدار اور چوکیدار کا تاریخی کردار ادا کیا ہے،پیکا جیسے کالے قانون کے سبب تاریخ عمران کی ہمیشہ مذمت کرتی رہے گی، میڈیا کی جوائنٹ ایکشن کمیٹی ، صحافتی تنظیموں، سول سوسائٹی کی جدوجہد کو خراج تحسین پیش کرتے ہیں، آنیوالے دنوں میں عمران کے دور کی پھیلائی ہر سیاہی ختم ہوگی۔پاکستان پیپلز پارٹی کے سیکرٹری جنرل نیئر حسین بخاری نے آرڈیننس کالعدم قرار دینے پر صحافیوں اور آزادی اظہار پر یقین رکھنے والوں کو مبارکباد دیتے ہوئے کہا ہے کہ پی ٹی آئی حکومت کے ایک اور فسطائیت زینیت عمل کو غیر آئینی قرار دیا گیا ہے۔
