بلوچستان بار کونسل ، بلوچستان یونین آف جرنلسٹس اور انسانی حقوق کمیشن بلوچستان کا متنازع پیکا ایکٹ کو بلوچستان ہائیکورٹ میں چیلنج کرنے کا فیصلہ، آئینی درخواست جلد دائر کی جائے گی ۔ بلوچستان بار کونسل کے وائس چیئرمین راحب خان بلیدی نے کوئٹہ پریس کلب کا دورہ کیا اور بلوچستان یونین آف جرنلسٹس کی نومنتخب کابینہ سے ملاقات کی اور بھاری اکثریت سے منتخب ہونے پر صدر خلیل احمد ، جنرل سیکرٹری عبدالغنی کاکڑ ، سینئر نائب صدر منظور رند ودیگر عہدیداروں کو مبارکباد دی، اس موقع پر صدر بی یو جے خلیل احمد نے کہا کہ آزادی صحافت کی راہ میں ایک منظم منصوبے کے تحت رکاوٹیں حائل کی جارہی ہیں تاکہ عوام کو معلومات تک رسائی کے بنیادی حق سے محروم کیا جاسکے ۔ بلوچستان کے صحافیوں نے انتہائی نامساعد حالات کے باوجود آزادی اظہار رائے کے لئے بھرپور کردار ادا کیا ۔ انہوں نے کہا کہ مشاورت کے بعد پیکا ایکٹ کو بلوچستان بار کونسل اور انسانی حقوق کمیشن کے ساتھ مل کرعدالت عالیہ بلوچستان میں چیلنج کرنے کا فیصلہ کیا ہے اس ضمن میں جلد آئینی درخواست دائر کردی جائے گی ۔راحب بلیدی نے کہا کہ بلوچستان میں صحافیوں کو درپیش مسائل کے حل کے لئے بی یو جے کا کردارقابل تحسین ہے ۔ انہوں نے اس عزم کا اظہار کیا کہ بلوچستان بار کونسل بی یو جے کے ساتھ ملکر آزادی صحافت کی راہ میں حائل رکاوٹیں دور کرنے کے لئے بھرپور کردار ادا کرے گی ۔
