پاکستان کرکٹ بورڈ (پی سی بی ) نے ورلڈکپ، انڈر 19 ورلڈکپ اور ویمنز ورلڈکپ سمیت انٹرنیشنل کرکٹ کونسل (آئی سی سی) کے 6 ایونٹس کی میزبانی کیلئے کوششیں شروع کر دی ہیں۔تفصیلات کے مطابق پی سی بی کے چیف ایگزیکٹو آفیسر (سی ای او) وسیم خان نے نجی خبر رساں ادارے سے گفتگو کرتے ہوئے کہا کہ آئی سی سی اگلے سال ستمبر ، اکتوبر تک ان ایونٹس کے میزبان کا فیصلہ کرے گا جبکہ پاکستان کرکٹ بورڈ آئی سی سی ایونٹس کی میزبانی کیلئے پیشکش کرچکا ہے، کوویڈ کی وجہ سے یہ فیصلہ تاخیر کا شکار ہوا ہے لیکن امید ہے کہ ستمبر یا اکتوبر تک آئی سی سی اگلے ایونٹس کے میزبان کا اعلان کردے گا۔پی سی بی چیف ایگزیکٹو کا کہنا تھا کہ 2023ءسے 2027ءکے فیوچر ٹور پروگرام (ایف ٹی پی) میں جنوبی افریقہ، انگلینڈ، آسٹریلیا اور نیوزی لینڈ جیسی ٹیموں کے ساتھ زیادہ سیریز رکھیں گے جبکہ کہ کوشش ہوگی کہ ٹیسٹ سیریز میں بھی کم از کم تین ٹیسٹ ہوں، انڈیا کے ساتھ فی الحال ایف ٹی پی میں کوئی ونڈو نہیں رکھی جارہی۔ایک سوال کے جواب میں انہوں نے کہا کہ سینئرز کے ساتھ ساتھ شاہینز ، انڈر 19 اور انڈر 16 ٹیموں کیلئے بھی دو طرفہ سیریز منعقد کی جائیں گی۔ کوویڈ کے چیلنجز کے باوجود بھی پاکستان نے بھرپور کرکٹ آرگنائز کی، پروٹوکولز پر نیوزی لینڈ اور جنوبی افریقہ میں ہونے والے تجربات سے بھی سبق حاصل کرکے اپنے انتظامات کو مزید بہتر کرنے کی کوشش کریں گے۔
