قومی اسمبلی کے مشترکہ اجلاس کے موقع پر راولپنڈی اسلام آباد یونین آف جرنلسٹس نے آزادی صحافت مارچ کی حتمی تاریخ کا اعلان کردیا ہے ،جو اتوار12ستمبر 2021 کو نیشنل پریس کلب اسلام آباد سے شروع ہو کر جناح ایونیو سے گزرتے ہو ئے پارلیمنٹ کے سامنےڈی چوک میں 24 گھنٹے کے احتجاجی دھرنے میں تبدیل ہو جا ئےگا، جہاں پر رات بھر ملک کےمعروف اینکرز اپنے پروگرام کریں گے، علامتی دھرنا13 ستمبر کو پارلیمنٹ کے مشترکہ اجلاس کے بعد ختم کر دیا جائے گا، راولپنڈی اسلام آباد یونین آف جرنلسٹس کا اجلاس صدر عامر سجاد سید کی سربراہی میں ہواجس میں پریس فریڈم ایکشن کمیٹی کے چیئرمین افضل بٹ،سیکرٹری آر آئی یو جے طارق علی ورک،ممبر ایف ای سی شفیق راجہ، صدر نیشنل پریس کلب شکیل انجم، سیکرٹری انور رضا،سابق صدر آر آئی یو جے علی رضا علوی،اصغر چوہدری، ایگزیکٹو ممبر اظہار خان نیازی،روبینہ شاہین،فرحت عباسی،افشاں قریشی ،سنیئر صحافی آصف بشیر چوہدری،نیئرعلی ،رانا زاہد،رانا کوثر،جعفر بلتی کے علاؤہ صحافیوں کی کثیر تعداد نے شرکت کی، اجلاس میں صحافیوں کی جبری برطرف،تنخواہوں واجبات کی عدم ادائیگی،تنخواہوں میں کٹوتیوں،صحافیوں پر ہونے والے تشدد اور اغواء کے واقعات،صحافیوں کو آف ائیر کرنے اور پروگراموں کی بندش اور پاکستان میڈیا ڈویلپمنٹ اتھارٹی کے کالے قانون کے حوالے سے تفصیلی گفتگو کی گئی اور فیصلہ کیا گیا کہ مشترکہ اجلاس کے دوران پارلیمنٹ کے باہر احتجاجی دھرنا دیا جائے گا، مشترکہ اجلاس 13 ستمبر 2021 کو بلایا گیا ہے اور آر آئی یو جے آزادی صحافت ریلی 12 ستمبر کو شام چار بجے نیشنل پریس کلب اسلام آباد سے شروع کرے گی جو پارلیمنٹ کے باہر پہنچ کر 24 گھنٹے کے دھرنے میں تبدیل ہو جائے گی،ریلی میں سیاسی ،مذہبی،وکلا،طلباءاور تاجر تنظیمیں بھی شرکت کریں گی ۔
