نجی ٹی وی اے آر وائی نیوز کی جانب سے ادارے سے نکالے جانے کے بعد اینکر پرسن ارشد شریف کا موقف آگیا۔ایک ٹویٹ میں ارشد شریف نے لکھا “پاکستان اور دنیا بھر میں تمام دیکھنے اور سننے والے پاکستانیوں، صحافیوں اور دوستوں کے پیار، اعتماد اور مدد کا تہہ دل سے مشکور ہوں۔انہوں نے اے آر وائی نیوز کے مالک سلمان اقبال کا شکریہ ادا کرتے ہوئے کہا ” آپ نے دباؤ کے باوجود موقع دیا کہ اپنے لوگوں کے لئے صحافت کروں ۔” انہوں نے اے آر وائی کے نائب صدر عماد یوسف کیلئے نیک خواہشات کا اظہار کرتے ہوئے دعا کی کہ اللہ ان کی اور تمام دوستوں کی مشکلات آسان کرے۔ خیال رہے کہ گزشتہ روز اے آر وائی نیوز نے اپنے ایک ٹویٹ میں ارشد شریف سے راہیں جدا کرنے کا اعلان کیا تھا۔ چینل انتظامیہ کے مطابق ارشد شریف نے سوشل میڈیا پر چینل کی پالیسی کے خلاف ٹویٹس کیں جس کے باعث آٹھ سال کا تعلق ختم کرنا پڑا۔اے آر وائی کی طرف سے ارشد شریف کو نوکری سے نکالے جانے کا اعلان اپنے سوشل میڈیا اکاﺅنٹس کے ذریعے کیا گیا۔سوشل میڈیا پوسٹس میں اے آر وائی نیوز کی طرف سے کہا گیا ہے کہ ”اے آر وائی نیٹ ورک کا اپنے ملازمین کے لیے قواعد و ضوابط اس بات کو واضح کرتا ہے کہ ملازمین کی سوشل میڈیا پر کی گئی پوسٹس کمپنی کی پالیسی کے تحت ہوں گی۔ہم بھاری دل کے ساتھ یہ اعلان کرنا چاہتے ہیں کہ 8سال ایک ساتھ سفر کرنے کے بعد اے آر وائی نے ارشد شریف سے راستے جدا کر لیے ہیں۔نجی ٹی وی چینل کی طرف سے ارشد شریف کے لیے مستقبل میں نیک تمناﺅں کا اظہار کرتے ہوئے کہا گیا ہے کہ ”ہم ان کی مستقبل کی ’جدوجہد‘ کے لیے نیک خواہشات رکھتے ہیں۔“رپورٹ کے مطابق نجی ٹی وی چینل کی طرف سے ارشد شریف کی کوئی ایسی سوشل میڈیا پوسٹ سامنے نہیں لائی گئی جو ان کی کمپنی پالیسی کے خلاف تھی۔
