مقبول اداکار اسامہ خان نے انکشاف کیا ہے کہ ندا یاسر کی جانب سے مارننگ شو میں ان کی منگنی ساتھی اداکارہ زینب شبیر سے ہونے کی بات کہنے کے بعد ان کے رشتے آنا بند ہوگئے۔اسامہ خان نے حال ہی میں یاسر نواز، دانش نواز اور ندا یاسر کے ہمراہ ان کے یوٹیوب شو میں شرکت کی، جہاں انہوں نے مختلف معاملات پر کھل کر بات کی۔اداکار نے بتایا کہ اب شوبز میں کیریئر بننے کے بعد ان کا شادی کرنے کا ارادہ ہو رہا ہے۔ پروگرام میں بات کرتے ہوئے اسامہ خان نے بتایا کہ شوبز میں آنے سے قبل وہ بینک میں ملازمت کیا کرتے تھے اور اپنی تنخواہ سے وہ اس وقت سونا خرید کر رکھتے تھے۔اداکار کے مطابق شوبز میں آنے سے قبل جب وہ اپنے آبائی شہر گوجرانوالہ میں ہوتے تھے، تب وہ ایک لڑکی کے ساتھ تعلقات میں بھی تھے۔اسامہ خان نے بتایا کہ ایک بار شادی میں انہیں ایک لڑکی پسند آئی اور انہوں نے والدہ کو ان سے شادی کروانے کا کہا، جس پر والدہ انہیں لے کر اگلی رات لڑکی کے گھر گئیں، جہاں ان کی جانب سے بات کرنے سے قبل ہی لڑکی کے گھر والوں نے بتایا کہ لڑکی کا رشتہ طے ہوچکا ہے اور اگلے ماہ ان کی شادی ہے۔اپنے اہل خانہ پر بات کرتے ہوئے اداکار نے بتایا کہ وہ دو بہنوں اور دو بھائیوں میں سب سے چھوٹے ہیں، ان کے تمام بہن اور بھائی شادی شدہ ہیں۔اسامہ خان نے بات کرتے ہوئے انکشاف کیا کہ کورونا کے دور میں جب ان کے والد کو کورونا ہوا تو ان کے والد ڈر گئے تھے، اس لیے ان کے والد کو کورونا کی بات کسی کو نہیں بتائی گئی لیکن کچھ دن بعد جب وہ ندا یاسر کے مارننگ شو میں آئے تو میزبان نے ٹی وی پر بتایا کہ اسامہ خان کے والد کو بھی کورونا ہوا ہے۔اسی طرح اسامہ خان نے انکشاف کیا کہ دوسری بار ندا یاسر نے مارننگ شو میں بتایا کہ اسامہ خان اور زینب شبیر کی منگنی ہو چکی ہے، جس کے بعد لوگوں کو یہی لگا کہ دونوں اداکاروں کی شادی ہو چکی ہے۔اداکار کا کہنا تھا کہ حقیقت میں ایسا کچھ نہیں لیکن ندا یاسر کی جانب سے اعلان کرنے کے بعد لوگوں کو یہی لگتا ہے کہ ان کے اور زینب شبیر کے درمیان معاملات طے ہیں۔اسامہ خان نے شکایت کی کہ ندا یاسر کی جانب سے ایسا اعلان کرنے بعد ان کے لیے شادی کے رشتے آنا بند ہوگئے۔پروگرام کے دوران ندا یاسر نے اپنی غلطیوں پر اظہار شرمندگی بھی کیا اور ساتھ ہی واضح کیا کہ اسامہ خان اور زینب شبیر کی منگنی نہیں ہوئی۔
