وفاقی وزیر اطلاعات و نشریات فواد چوہدری نے کہا ہے کہ حکومت جون میں بنائی گئی نئی فلم پالیسی کا اعلان کرے گی۔سماجی رابطے کی ویب سائٹ ٹویٹر پر ٹویٹ کرتے ہوئے انکا کہنا تھا کہ نئی فلم پالیسی میں فلموں پر تمام بڑے ٹیکسز ختم کردیے جائیں گے۔نئی پالیسی میں فلم اور ڈراما صنعت کو کئی فوائد دیے گئے ہیں، جن سے دونوں فیلڈز کو فائدہ ہوگا۔ اُمید ہے کہ نئی فلم پالیسی کے سینما انڈسٹری پر دیرپہ بہترین اثرات ہوں گے۔دریں اثنا فلم پرڈیوسرز ایسوسی ایشن کے وفد سے ملاقات میں وزیراطلاعات نے فلمی صنعت کی بحالی کیلئے ہر ممکن اقدامات اٹھانے کے عزم کا اعادہ کیا۔۔ اس موقع پر چیئرمین سی پیک اتھارٹی عاصم سلیم باجوہ، وزیراعظم کے معاون خصوصی برائے امور نوجوانان عثمان ڈار، سینیٹ کی سٹینڈنگ کمیٹی برائے اطلاعات ونشریات کے چیئرمین سینیٹر فیصل جاوید، سیکریٹری اطلاعات شاہیرہ شاہد، ڈائریکٹر جنرل ڈیمپ عمرانہ وزیر اور ایف بی آر کے حکام بھی موجود تھے۔وفد کی قیادت ایسوسی ایشن کے وائس چیئرمین جرجیس سیجا کر رہے تھے جبکہ دیگر ارکان میں شیخ امجد رشید، سنتیش آنند، چودھری کامران، فضا علی مرزا، عرفان ملک اور بدر اقبال بھی شامل تھے۔ملاقات کے دوران طویل عرصے سے التوا کا شکار فلم پالیسی کو حتمی شکل دی گئی۔ فلمی صنعت کی بحالی کیلئے تمام تر ممکنہ اقدامات اٹھانے کے عزم کا اعادہ کیا گیا۔اس موقع پر گفتگو کرتے ہوئے وفاقی وزیر اطلاعات و نشریات چودھری فواد حسین نے کہا کہ پاکستان میں شعبہ فلم کی ترقی اور بحالی پاکستان تحریک انصاف حکومت کی اولین ترجیح ہے۔فواد چودھری کا کہنا تھا کہ حکومت پاکستانی فلموں کی ایکسپورٹ کی بھرپور حوصلہ افزائی کیلئے پر عزم ہے، اس ضمن میں سعودی عرب اور چین کے ساتھ تعاون اور اشتراک سودمند ثابت ہو سکتے ہیں۔انہوں نے کہا کہ ایکسپورٹ کے حوالے سے فلم پروڈیوسرز اپنی ایسوسی ایشن میں دو فوکل گروپ تشکیل دیں، ایک فوکل گروپ خلیجی ممالک جبکہ دوسرا چین پر توجہ مرکوز کرے۔وفاقی وزیر اطلاعات نے کہا کہ فلمیں تفریح کا مقبول ذریعہ ہونے کے علاوہ تعلیم اور شعور بیدار کرنے کا بھی موثر ابلاغی فن مانی جاتی ہیں۔ ہم نے فلمی صنعت کی تنزلی کو ترقی کے سفر میں بدلنا ہے۔انہوں نے کہاکہ مثبت سوچ و رحجانات، روشن خیالات کی ترویج اور عدم برداشت کے خاتمے کیلئے فعال فلمی صنعت وقت کی اہم ضرورت ہے۔ فلمیں ملکی ثقافت، تاریخ، اقدار، ورثے اور سکرین ٹورازم اجاگر کرنے کا بھی اہم ذریعہ ہیں۔ انہوں نے کہا کہ ہمیں پاکستان کے سافٹ امیج اور روشن تشخص کو دنیا بھر میں فروغ دینا ہے۔ان کا کہنا تھا کہ فلمی صنعت کو بھی دیگر شعبوں کی طرح ٹیکنالوجی اور جدید تقاضوں سے ہم آہنگ کرنا وقت کی اہم ضرورت ہے۔ فواد چودھری نے کہا کہ حکومت فلمی صنعت کی ترویج کیلئے ٹیکس مراعات اور این او سیز کی منظوری کے عمل کو سہل بنانے سمیت دیگر اہم اقدامات اٹھا رہی ہے۔ کامیاب جوان پروگرام کے تحت نوجوان فلم سازوں کی حوصلہ افزائی کرنے کی تجویز بھی زیر غور ہے۔
