عدالت عظمیٰ نےپرنٹ اور الیکٹرانک میڈیا کے صحافیوں اور کارکنوں کی تنخواہوں اور بقایاجات کی عدم ادائیگی سے متعلق کیس کی سماعت کے دوران نوائے وقت میڈیا گروپ کی سربراہ خاتون مالک کو آئندہ سماعت پر ذاتی طور پر عدالت میں پیش ہونے کا حکم جاری کردیاہے ، جسٹس عمر عطا بندیال کی سربراہی میں جسٹس اعجازالاحسن پر مشتمل دو رکنی بنچ نے سوموار کے روزکیس کی سماعت کی تو پی ایف یوجے کے دو دھڑوں کے سربراہ افضل بٹ اور پرویز شوکت سمیت متعدد صحافی پیش ہوئے ، سماعت شروع ہوئی تو نوائے وقت کی جانب سے کوئی بھی پیش نہ ہوا جس پر عدالت نے معاملہ 24دسمبر تک ملتوی کرتے ہوئے نوائے وقت میڈیا گروپ کی خاتون سربراہ کو آئندہ سماعت پر ذاتی طور پر پیش ہونے کا حکم جاری کیا ، دوران سماعت افضل بٹ نے کہاکہ عدالت نے تین بار احکامات جاری کئے تھے کہ کسی ورکر کو فارغ نہ کیا جائے جس پر جسٹس اعجاز الاحسن نے کہاکہ ہمارا ایسا کوئی حکم نہیں ، اگر کسی ادارے کا مالک کسی ملازم کو نہیں رکھنا چاہتا یا کاروبار نہ چلنے کی بناء پر ملازمین کو فارغ کرنا چاہتا ہے تو عدالت اسے اس ملازم کو رکھنے پر مجبور نہیں کرسکتی ، البتہ ہم نے یہ ضرور کہاہے کہ ملازمین کو ان کی تنخواہیں اور بقایاجات ادا کئے بغیر کوئی ادارہ فارغ نہیں کرسکتا، انہوں نے کہاکہ آپ اس کیلئے کسی موزوں فورم سے رجوع کیوں نہیں کرتے ؟ جس پر افضل بٹ نے کہاکہ ہمیں اسی عدالت سے ہی امید ہے کہ یہیں سے ہی داد رسی ملے گی ، جس پر جسٹس اعجاز الاحسن نے کہاکہ آپ اس کیلئے باضابطہ طور پر تحریری درخواست دائر کریں ،عدالت اس کا جائزہ لے گی۔کیس کی آئندہ سماعت سپریم کورٹ کی لاہور برانچ رجسٹری میں ہوگی۔
