پاکستان جرنلسٹس فورم متحدہ عرب امارات کے وفد نومنتخب صدر طاہر منیر طاہر (بیورو چیف نوائے وقت) اور سینئر نائب صدر سعدیہ عباسی(بیورو چیف نیو نیوز) کے اعزاز میں نیشنل پریس کلب اسلام آباد کی منتخب باڈی کی جانب سے این پی سی میں ظہرانے کا اہتمام کیا گیا۔ صدر انور رضا ، جنرل سیکٹری خلیل احمد راجہ ، فنانس سیکٹری نیئر علی ، انچارج راولپنڈی کیمپ آفس شکیلہ جلیل، سابق صدر طارق چودھری سمیت گورننگ باڈی کے ارکان نے شرکت کی ۔ اس موقع راولپنڈی اسلام آباد یونین اف جرنلسٹس کے صدر عابد عباسی،سیکریٹری طارق ورک اور دیگر ممبران بھی موجود تھے۔صدر پی جے ایف طاہر منیر طاہر نے یو اے ای میں پاکستانی کمیونٹی کے مسائل کی نشاندہی کی ۔ ان کا کہنا تھا کہ جیل میں موجود پاکستانی قیدیوں اور یو اے ای میں مقیم پاکستانیوں کے مسائل ایوان بالا تک پہنچانے کے لیے نیشنل پریس کلب اور صحافیوں کا کردار بہت اہم ہے ۔ اس موقع پر سینئر نائب صدر پی جے ایف سعدیہ عباسی کا کہنا تھا کہ متحدہ عرب امارات میں پاکستانی صحافی پاکستان کا مثبت امیج اجاگر کرنے اور کمیونٹی کی خدمت میں پیش پیش ہیں ۔سعدیہ عباسی کا کہنا تھا کہ نیشنل پریس کلب اسلام آباد دنیا بھر میں مقیم صحافیوں کا گھر ہے خواہش ہے کہ یو اے ای میں مقیم تمام پاکستانی صحافی نیشنل پریس کلب کے پلیٹ فارم سے پاکستان میں صحافیوں کے ساتھ نیٹ ورکنگ اور معلومات کے تبادلے کے لیے کام کریں ۔ صدر نیشنل پریس کلب انور رضا نے مہمان صحافیوں کا شکریہ ادا کیا ۔ اس موقع پر نیشنل پریس کلب اور پاکستان جرنلسٹ فورم کے مابین اشتراک کی مفاہمتی یاداشت بھی پیش کی گئی جس کے تحت پاکستان جرنلسٹس فورم یو اے ای اور نیشنل پریس کے مابین معلومات کی فراہمی اور صحافیوں کی فلاح و بہبود اور تربیتی ورک شاپ و ایکسینج پروگرام پر کام کیا جائے گا ۔ اس ایم او یو کے تحت پاکستان جرنلسٹس فورم کے ممبران صحافی پریس کلب کے ممبران کی طرح پریس کلب میں تفریحی اور تعلیمی سرگرمیوں میں حصہ لینے کے ساتھ ساتھ پریس کلب اور پاکستان جرنلسٹس فورم کے درمیان خبروں اور معلومات کا تبادلہ بھی ممکن ہو گا ۔ نیشنل پریس کلب اسلام آباد مفاہمتی یاداشت جاری کرے گا-
