تحریر: خرم علی عمران
عالم پناہ، شہنشاہ جہاں، صاحبقراں عالی جناب ڈونلڈ ٹرمپ
اپنی دنیا میں سب سے بڑے عقیدت مند اور عاشق کا کافی عرصے بعد سلام شوق قبول فرمائیے کہ ہوئی تاخیر تو کچھ باعثِ تاخیر بھی تھا ۔ ارے دراصل وہی بابا کالے کرتوتی گورداس پوری جن سے رد بلا کا تعویز بنوا کرچند ماہ پہلے آپ کو بھجوایا تھا اور جس کے پیسے یعنی ہدیہ شکرانہ ہمارے کولیشن سپورٹ فنڈ کے ساتھ ساتھ آپ نے ابھی تک نہیں بھجوائے تو وہی بابا جی اپنی ایک سائلہ کا جن نکالتے ہوئے نازیبا حالت میں پکڑے گئے تھے اور کچھ بدخواہوں نے خوامخواہ ہی پولیس کیس بنوادیا کہ یہ ظاہر بین لوگ باطنی معاملات اور احوالِ بزرگاں کیا جانیں تو بس اسی کو سلجھانے میں لگا تھا بس اسی لئے دیر ہوگئی ورنہ آپ کو نامہء شوق بھیجنے کا تو بہت دنوں سے دل چاہ رہا تھا بلکہ کب نہیں چاہا کرتا۔ اور جانب عالی! آپ تو حسب سابق پے در پے ماسٹر اسٹروکس کھیلے ہی چلے جارہے ہیں کبھی کبھار کوئی عام سا اسٹروک بھی کھیل لیا کیجئے اور عالمی سیاست کے بڑے بڑے کھلاڑیوں کی آنکھ میں جیسے آپ نے دھند بھر دی ہے اور کسی کو آپ کی اگلی چال سمجھ آنا تو دور اسکا شائبہ بھی نہیں ہو پاتا اور آپ اس تیزی سے پینترے بدلتے ہیں کہ جتنی تیزی سے گرگٹ بھی رنگ نہیں بدل پاتا تو میں تو ہمیشہ سے ہی کہا کرتا ہوں کہ میرا ٹرمپ مہان ہے جیسے کہ یہ بھارتی لوگ بس ایویں ہی کہتے رہتے ہیں کہ انکا بھارت مہان ہے۔
بھارت پر یاد آیا جناب والا کہ آپ نے کیا گھمن پھیریاں دی ہیں ایک ساتھ دو دو وزرائے اعظم کو کشمیر کے مسئلے پر۔ کیا بات ہے سر جی آپ کی، دو بلکہ دو سے بھی زیادہ کشتیوں کی بیک وقت سواری کا فن تو کوئی آپ سے سیکھے۔ مودی بھی خوش اور خان بھی، اور دونوں ملکوں کے عوام بھی ،رہے وہ بے چارے مظلوم کشمیری تو ارے ان کا کیا ہے بس شور مچانے کی عادت پڑی ہوئی ہے آزادی آزادی ،اب انہیں کون سمجھائے۔ سر جی مجھے یقین ہے کہ آپ کی عدیم النظیر ذہانت تک پہنچنا ہما شما کے بس کی بات نہیں ہے۔ پھر یہ بھی ہے کہ آپ کو الیکشن کا سامنا کرنا ہے اور انڈین اور پاکستانی نژاد امریکن ووٹس بھی آپ کےاہم ہیں مگر اس سے زیادہ آپ اتنے رحم دل ہیں کہ کسی کا بھی دل توڑنا پاپ سمجھتے ہیں تو اسی لئے آپ خوش رہے رحمان بھی اور راضی رہے شیطان بھی کے فارمولے پر عمل کرتے ہوئے دونوں متضاد ملکوں ووٹس کہیں اور نہیں جانیں دیں گے اور دونوں کا دل بھی نہیں ٹوٹنے دیں گے واہ جی واہ۔ اور ہاں ذرا سا شکوہ ہے کہ ایران کے معاملے پر اپ میری سابقہ چند ناموں میں کی گئی گزارشات پر توجہ نہیں دے رہے جانے کیوں لیکن مجھے یقین ہے کہ اس میں بھی کوئی رمز پوشیدہ ہوگا جو ہم جیسے ناقص العقل ہی نہیں بلکہ بڑے بڑے پاگل بھی نہیں سمجھ سکتے۔ ٹھیک ہے سر آپ ایران کو ڈانٹتے پھٹکارتے رہیئے اورجوابا پھٹکاریں سہیں آپ کی مرضی۔ اور جانب عالی یہ میں کیا سن رہا ہوں کہ میرے منہ میں خاک آپ کے خلاف جو بائیڈن ٹیلی فون کال کے سلسلے میں مواخذے کی کاروائی کا خدشہ امریکن پارلیمنٹ کی جانب سے ابھر رہا ہے تو اسے یہیں دبا دیں اور میرا عاجزانہ مشورہ ہے کہ بلی کو شروع میں ہی ماردیں تو بہتر رہے گا ویسے آپ بھی یہ خوامخواہ کی کالیں ادھر ادھر مت کیا کریں کہ یہ آپ کی شان کے خلاف ہے اورلوگ بھی کان لگائے بیٹھے رہتے ہیں۔ اور اس متوقع مواخذے کی کاروائی سے بلکل نہ گھبرائیے گا کہ میں نے بابا جی کالے کرتوتی گورداس پوری کے کان میں بات ڈال دی ہے اور وہ یہیں بیٹھے بیٹھے ایسی کاٹ کریں گے کہ دشمن منہ کی کھائیں گے اور محبوب آپ کے قدموں میں ہوگا۔ بالکل بے فکر رہیں بس وہ سابقہ ہدیئے شکرانے کے ساتھ موجودہ نذرانہ شکرانہ بھی ذرا جلدی بھجوا دیجئے گا کہ بابا جی شکایت کررہے تھے اور آجکل ویسے بھی ان پر پولیس کیس سے نپٹنے کی وجہ سے کچھ کڑکی طاری ہے۔ دیکھیں نا کاٹ کرنے میں خرچہ بھی تو ہوا کرتا ہے نا۔ کالا مرغا مگرمچھ کے انڈے اور نہ جانے کیا کیا الا بلا ۔۔
اور باتیں تو بہت ساری ہیں لیکن مجھے آپ کے قیمتی وقت کا احساس ہے اس لئے بس ایک دو چیزوں پر جناب کی توجہ مبذول کراتے ہوئے اختتام کلام اور آپ کو سلام کروں گا پہلی بات تو یہ کہ طالبان کے ساتھ امن مذاکرات ختم کرنے کا جو دانشمندانہ فیصلہ اپ نے کیا ہے لوگ خوامخواہ ہی اس پر انگلیاں اٹھا رہے ہیں اورآپ پر دباؤ ڈالنے کی ناکام کوشش کررہے ہیں کہ اسے بحال کیا جائے حالانکہ مجھے پتہ ہے کہ آپ ایک انتہائی دلیر ،بے خوف اور بے جگر انسان ہیں اور مزید جنگ جنگ کھیلنے کے موڈ میں ہیں اتنی جلدی کہاں دل بھرے گا آپ کا۔ اب تو میں کہتا ہوں کہ طالبان چاہے جتنی بھی ضد کریں آپ دوبارہ مذاکرات ہرگزنہیں کیجئے گا اور مردوں کی طرح اپنی بات پر قائم رہیئے گا ۔ دیکھیں نا یہ بھی کوئی بات ہوئی کہ آپ جن کی بات ٹالنے کی ساری دنیا میں کسی کی ہمت نہیں انکی بات نہ جانے کس زعم میں یہ طالبان نہیں مان رہے بلکہ اپنی شرائط پر مصر ہیں ۔ آپ کے نادان دوست مودی جی نے آپ کو یہ مذاکرات ختم کرنے کا جو مشورہ دیا ہے وہ میری حقیقتا ناقص رائے میں بالکل درست ہے اور اس کے دوررس تنائج آپ کی عقابی نگاہوں سے یقینا اوجھل نہیں ہوں گے۔ پھر چلتے چلتے یہ بھی کہنا ہے کہ آپ روزانہ اپنی نظر ضرور اتارا کریں کہ روز بی روز آپ کا نکھار بڑھتا ہی جارہا ہے کہیں کسی کی بلکہ کسی کی کیا میری ہی نظر نا لگ جائےنا۔ باقی یہاں آپ کی دعاؤں سے آپ کے سابقہ پنٹروں کی مہربانیوں سے اور آپ کے موجودہ عالمی مالیاتی اداروں شقفت سے معاشی ابتری کے علاوہ باقی سب خیریت ہے اور یہاں کی رعایا ہاتھ اٹھا اٹھا کر دن رات آپ کے لئے دعائیں کرتی رہتی ہے۔ اب اجازت دیجئے جیسے ہی وقت ملا پھر حاضری دوں گا میری طرف سے ملکہ عالیہ کو خصوصی اور صاحب زادیوں کو عمومی پیاراور دعا۔ دنیا میں آپ کا سب سے بڑا عاشق اور عقیدت مند۔(خرم علی عمران)
