وفاقی حکومت نے چیئرمین پی ٹی وی نعیم بخاری کے ہمراہ پی ٹی وی کے 2 ڈائریکٹر وسیم رضا اوراصغر ندیم کو بھی فارغ کردیا ہے ۔معلوم ہوا ہے کہ وفاقی کابینہ نے عامر منظور کی بطور ایم ڈی سرکاری ٹی وی معطلی کو کمپنیز ایکٹ کی خلاف ورزی قرار دیدیا ہے۔ ذرائع کے مطابق ایم ڈی سرکاری ٹی وی کی معطلی کیلئے بورڈ ارکان کی مطلوبہ تعداد موجود نہیں تھی۔ عامر منظور کو ایم ڈی کے عہدے سے معطل کرنے کیلئے 5 بورڈ ارکان موجود تھے۔ وفاقی کابینہ نے یکم جنوری 2021 کو کی گئی ایم ڈی سرکاری ٹی وی کی معطلی ختم کرنے کی منظوری دیدی ہے۔ وفاقی کابینہ نے عامر منظور کو ایم ڈی سرکاری ٹی وی کے عہدے پر بحال کرنے کی منظوری دی ہے۔ سرکاری ٹی وی بورڈ کی تشکیل نو کیلئے الگ سے سمری کابینہ میں پیش کی جائے گی۔ وفاقی کابینہ نے نعیم بخاری کو چیئرمین اور ممبر سرکاری ٹی وی بورڈ کے عہدے سے ہٹانے کی بھی منظوری دی ہے۔ وسیم رضا اور اصغر ندیم کو بھی بورڈ ممبران کے عہدوں سے ہٹانے کی منظوری دیدی گئی ۔ وفاقی حکومت نے یہ فیصلہ اسلام آباد ہائی کورٹ کے فیصلے کی روشنی میں کیا۔
