نادیہ حسین کی سائبرکرائم سیل میں پیشی، الزام پر معافی مانگ لی۔۔

معروف اداکارہ و ماڈل نادیہ حسین اپنے وکیل کے ہمراہ  ایف آئی اے سائبر کرائم سرکل کے دفتر پہنچ گئیں۔نادیہ حسین کو آج ایف آئی کی جانب سے طلب کیا گیا تھا۔اس سے قبل 14 مارچ کو ایف آئی اے سائبر کرائم سرکل کی ٹیم نے معروف ماڈل اور اداکارہ نادیہ حسین کا موبائل فون سیز کر دیا تھا۔ایف آئی اے حکام کا کہنا ہے کہ جس شخص نے سینئر ایف آئی اے افسر کی ڈی پی واٹس ایپ پر لگا کر ایف آئی اے افسر بن کر نادیہ حسین سے بات کی اور ان سے رشوت مانگی موبائل فون سے اس کا پتہ لگایا جائے گا۔نادیہ حسین کے خلاف سائبر کرائم سرکل میں انکوائری جاری ہے۔ایف آئی اے کا کہنا ہے کہ نادیہ حسین نے شکایت درج کروانے کے بجائے سوشل میڈیا پر ایف آئی اے کے خلاف بے بنیاد الزامات لگائے۔دریں اثنا ماڈل و اداکارہ نادیہ حسین کا کہنا ہے کہ میں نے اپنا بیان ایف آئی اے سائبر کرائم کو ریکارڈ کروا دیا ہے، ویڈیو بیان سے ایف آئی اے افسر کی دل آزاری ہوئی تو معذرت خواہ ہوں۔کراچی میں ایف آئی اے دفتر کے باہر میڈیا سے گفتگو کرتے ہوئے نادیہ حسین نے کہا کہ اداروں کو اور مجھے آگاہی کیلئے ایک ویڈیو بنانی چاہیے، ملزمان نے مجھ سے صرف واٹس ایپ پر ہی رابطہ کیا تھا، مجھے سمجھ نہیں آرہا ہے واٹس ایپ سے کیسے ملزمان کو پکڑا جائے گا؟نادیہ حسین نے کہا کہ معلوم نہیں تھا کہ ایف آئی اے دفتر میں شکایت جمع کرنا ضروری ہوتا ہے، عوام سے کہوں گی کہ ڈریں نہیں شکایت ضرور کریں۔انہوں نے کہا کہ ایف آئی اے حکام کو جعلی کال پر تمام معلومات فراہم کردی ہے، کال موصول ہونے کے بعد ایف آئی اے پورٹل پر شکایت درج کروائی تھی، میرے علم میں نہیں تھا کہ تحریری طور پر بھی شکایت درج کروانی تھی، اعلیٰ حکام سے التماس ہے کہ جعل سازوں سے لوگوں کو بچایا جائے۔