فراڈ کیس میں اداکارہ نادیہ حسین کے شوہر کی ایف آئی اے کے ہاتھوں گرفتاری کا معاملہ، نادیہ حسین نے مبینہ جعلساز ایف آئی اے افسر پر رشوت طلبی کا الزام عائد کردیا۔معروف اداکارہ نادیہ حسین نے اپنی انسٹا گرام آئی ڈی پر ایف آئی اے افسر پر رشوت مانگنے کا الزام عائد کرتے ہوئے مبینہ آڈیو بھی لیک کردی ہے۔ماڈل و اداکارہ کی جانب سے شیئر کردہ آڈیو کالز کی ویڈیوز میں نعمان نامی شخص کو کہتے ہوئے سنا جا سکتا ہے کہ ان کی اور نادیہ حسین کے شوہر عاطف محمد خان کی آپس میں ڈیل ہو چکی ہے، اب اداکارہ انہیں پیسے فراہم کریں تو ان کے شوہر کو چھڑوانے کے انتظامات کیے جائیں۔مبینہ افسر نے نادیہ حسین پر دباؤ ڈالا کہ وہ انہیں 50 لاکھ نقد رقم فراہم کریں جب کہ باقی رقم بھی جلد انہیں ادا کی جائے تو ان کے شوہر کو جلد رہا کروایا جا سکے گا۔ان کی جانب سے شیئر کردہ ویڈیوز میں نعمان نامی شخص کو نادیہ حسین سے پہلے سخت لہجے اور بعد ازاں نرم لہجے میں بات کرتے سنا جا سکتا ہے۔ویڈیوز میں نادیہ حسین مطالبہ کرتی ہیں کہ ان کی ملاقات شوہر سے کروائی جائے تاکہ وہ اپنے شوہر سے معلوم کر سکیں کہ اتنی بڑی رقم کہاں سے لینی ہے، کیوں کہ ان کے پاس اتنے پیسے موجود نہیں۔نادیہ حسین مبینہ ایف آئی اے افسر کا دعویٰ کرنے والے شخص کے موبائل فون نمبر کے اسکرین شاٹ بھی شیئر کیے، جب کہ انہوں نے ان کی واٹس ایپ پروفائل کی تصاویر بھی شیئر کیں۔نادیہ حسن نے آڈیوز اور ویڈیوز شیئر کرتے ہوئے خدشہ ظاہر کیا کہ ممکنہ طور پر ان کے ساتھ کسی نے فراڈ کیا ہوگا لیکن اگر واقعی ان کے ساتھ کسی ایف آئی اے ملازم نے بات کی تو یہ افسوس ناک بات ہے۔ساتھ ہی نادیہ حسین نے نادرا پر بھی سوال اٹھایا کہ کس طرح ان کے اور ان کے اہل خانہ کے نمبرز عام کردیے گئے کہ ہر کوئی ان سمیت تمام اہل خانہ کو فون کر رہا ہے۔ماڈل و اداکارہ نے بتایا کہ مذکورہ شخص نے پہلے ان کے بیٹے کو فون کیا تھا، جنہوں نے والدہ سے بات کرنے کا کہا جب کہ مذکورہ شخص نے ان کی ساس کو بھی فون کرکے شکایت لگائی کہ ان کی بہو چاہتی ہیں کہ ان کے شوہر جیل میں جائیں۔انسٹا گرام آئی ڈی پر نادیہ حسین نے الزام لگاتے ہوئے انہوں نے کہا کہ اس نے بھاری رشوت مانگی ہے مجھے حیرت ان لوگوں پر ہے جو مجبور لاچار عورت سے منہ پھاڑ کر پیسے مانگتے ہیں۔انہوں نے ڈرامائی انداز میں کہا نعمان بھائی آپ نے مجھے بیٹا بولا میں صرف اتنا جواب دونگی، بیٹا اب تو تیری خیر نہیں۔عاطف خان کی گرفتاری کے حوالے سے نادیہ حسین کا موقف ہے کہ فراڈ کیس میں ان کے شوہر کی گرفتاری کی خبر وائرل ہوئی یہ سچ ہے کہ میرے شوہر ایف آئی اے کی کسٹڈی میں ہیں اس میں ان کا کتنا ہاتھ ہے، یہ وقت بتائے گا۔ایف ائی اے حکام کا کہنا ہے کہ نادیہ حسین کو آڈیو اور رشوت طلبی کے حوالے سے بتا دیا تھا کہ یہ کوئی فراڈ ہے۔جعلساز نے اپنے نمبر پر ایف آئی اے افسر کی ڈی پی لگا رکھی تھی، نمبر ٹریس کرلیا ہے جو وہاڑی سے تعلق رکھنے والے شخص کا ہے۔ایف آئی آے حکام نے مزید کہا کہ پیکا ایکٹ کے تحت اس پر کام کریں گے اس طرح کی بیشتر کالیں پہلے بھی کی جاچکیں عوام اس سے ہوشیا رہیں۔یاد رہے نادیہ حیسن کے شوہر عاطف خان پر 80 کروڑ کی کرپشن کے الزام کے تحت ایف آئی اے میں مقدمہ درج ہے۔
