کراچی کے علاقے ڈیفنس میں نجی ٹی وی کے اینکر مرید عباس سمیت 2 افراد کے قتل کے اہم گواہ ندیم اسلم کی تدفین آج کی جائے گی۔ندیم اسلم کے لواحقین کے مطابق ندیم کی نمازِ جنازہ آج بعد نماز ظہر کشمیر کالونی کی مقامی مسجد میں ادا کی جائے گی، جبکہ تدفین ڈیفنس کے قبرستان میں ہو گی۔ندیم اسلم ملزم عاطف زمان کا ڈرائیور اور مرید عباس کے قتل کا اہم گواہ بھی تھا، جس نے چند روز قبل زہر پی کر خودکشی کی کوشش کی تھی اور جناح اسپتال کے آئی سی یو میں داخل تھا۔جناح اسپتال کی سربراہ ڈاکٹر سیمی جمالی کے مطابق چند روز قبل ندیم کی حالت بگڑنے پر اسے اسپتال کے آئی سی یو میں وینٹی لیٹرپر رکھا گیا تھا جہاں اس کی حالت تشویش ناک تھی، تاہم گزشتہ شب اس نے دم توڑ دیا۔تفتیشی ذرائع کا کہنا ہے کہ ندیم کو بیان لینے کے لیے تفتیشی پولیس نے طلب کیا تھا لیکن وہ نہیں آیا تھا اور اس نے زہر پی لیا تھا۔
